رووداو دیجیتاڵ
راوێژکاری ئاسایشی نیشتمانیی ئەمریکا رایدەگەیێنێت، ئەمریکا پێشوازی لە گفتوگۆی بنیادنەرانەی نێوان حکومەتی عێراق و حکومەتی هەرێمی کوردستان دەکات. دەشڵێت، لەگەڵ لایەنە پەیوەندیدارەکان کاردەکەن بۆ ئەوەی "لە زووترین کاتدا" بۆریی نێوان عێراق - تورکیا بکرێتەوە.
رۆژی دووشەممە 18ـی ئەیلوولی 2023، جەیک سولیڤان، راوێژکاری ئاسایشی نیشتمانیی ئەمریکا لە راگەیێندراوێکدا گوتی: "ئێمە پێشوازی لە گفتوگۆی بنیادنەرانەی نێوان حکومەتی عێراق و حکومەتی هەرێمی کوردستان دەکەین کە هەفتەی رابردوو کرا، بە مەبەستی چارەسەرکردنی کێشە هەڵپەسێردراوەکان بەشێوەیەک کە لەگەڵ دەستووری عێراقدا بگونجێت."
لە راگەیێندراوەکەدا هاتووە: "بە بڕیارەکەی حکومەتی عێراق خۆشحاڵین بۆ ناردنی پارەی زیاتر بۆ حکومەتی هەرێمی کوردستان کە یارمەتیی دڵنیابوون لە وەرگرتنی مووچەی فەرمانبەرانی حکومی و بەرەوپێشبردنی سەقامگیری و گەشەی ئابووری دەدات".
ئەوە لەکاتێکدایە، رۆژی یەکشەممە، 17ـی ئەیلوولی 2023، ئەنجوومەنی وەزیرانی عێراق بە سەرۆکایەتیی محەممەد شیاع سوودانی، سەرۆکوەزیران کۆبووەوە و بڕیاریدا بڕی 2.1 تریلیۆن دینار بۆ مانگەکانی 9، 10 و 11 بۆ هەرێمی کوردستان بنێرێت.
بڕیاری ناردنی ئەو بڕە پارەیە لەلایەن ئەنجوومەنی وەزیرانی عێراقەوە لەدوای ئەوە هات کە رۆژی پێنجشەممە، 14-9-2023، شاندێکی باڵای حکومەتی هەرێمی کوردستان بە سەرۆکایەتیی مەسرور بارزانی، سەرۆکوەزیران سەردانی بەغدای کرد و لەگەڵ بەرپرسانی حکومی و لایەنە سیاسییەکانی دیکەی پێکهێنەری حکومەت کۆبووەوە.
راوێژکاری ئاسایشی نیشتمانی ئەمریکا دەشڵێت: "ئەمریکا بەردەوام دەبێت لە کارکردن لەگەڵ هەموو لایەنە پەیوەندیدارەکان بۆ ئەوەی بەخێرایی و لە زووترین کاتدا هێڵی بۆریی نێوان عێراق - تورکیا بکرێتەوە" کە نەوتی هەرێمی کوردستانی پێدا هەناردەی بەندەری جەیهانی تورکیا دەکرا.
رۆژی 25ـی مانگی ئاداری 2023، هەناردەکردنی نەوتی هەرێمی کوردستان و کەرکووک بەهۆی بڕیاری دادگەی نێوبژیوانیی نێودەوڵەتی لە پاریس راگیرا. بەپێی بەدواداچوونی رووداو زیانی راگرتنی نەوتی هەرێمی کوردستان بۆ بەندەری جەیهان، لەو ماوەیەدا نزیکەی 5 ملیار دۆلار بووە.
جەیک سولیڤان دەڵێت، ئەمریکا "بەردەوام لە پەیوەندیدا دەبێت بۆ پێشخستنی عێراقێکی سەقامگیر و سەلامەت و پێشخستنی بڕیارە بەردەوامەکان سەبارەت بە پرسە هەڵپەسێردراوەکان".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ