رووداو دیجیتاڵ
دوای گیانلەدەستدانی سەرۆککۆماری ئێران و یاوەرانی، پاکستان ماتەمینیی گشتیی راگەیاند. سەرۆکوەزیرانی وڵاتەکە دەڵێت، "ئەوان هاوڕێی باشی پاکستان بوون."
بۆ هاوخەمیی گیانلەدەستدانی ئیبراهیم رەئیسی، سەرۆککۆمار و حوسێن ئەمیرعەبدوڵڵاهیان، وەزیری دەرەوەی ئێران؛ محەممەد شەهباز شەریف لە ئێکس پەیامێکی بڵاوکردووەتەوە و تێیدا یەک رۆژ ماتەمینیی گشتیی لە وڵاتەکەی راگەیاند.
محەممەد شەهباز شەریف دەڵێت، "پاکستان کەمتر لە یەک مانگ لەمەوپێش میوانداریی لە سەرۆککۆمار و حوسێن ئەمیرعەبدوڵڵاهیان، وەزیری دەرەوەی ئێران کرد، ئەوان هاوڕێی باشی ئێمە بوون."
سەرۆکوەزیرانی پاکستان گوتیشی، ئەمڕۆ وەکو رێزلێنانێک لە گیانلەدەستدراوانی رووداوەکە، ئاڵای وڵاتەکەیان بە نیوە هەڵکراوی دەمێنێتەوە.
ئێوارەی دوێنێ یەکشەممە 19-05-2024 دوای تێکشکانی هێلیکۆپتەرەکەیان لەکاتی گەڕانەوەیان لە ئازەربایجانەوە بۆ ئێران، ئیبراهیم رەئیسی، سەرۆککۆماری ئێران و یاوەرەکانی گیانیان لەدەستدا.
لەگەڵ رەئیسی، هەریەکە لە حوسێن ئەمیرعەبدوڵڵاهیان، وەزیری دەرەوەی ئێران؛ ئایەتوڵڵا ئەلهاشم، پێشنوێژ و گوتارخوێنی تەورێز؛ مالیک رەحمەتی، پارێزگاری تەورێز؛ سەرۆکی پاسەوانەکان و پاسەوانێکی سەرۆککۆمار، فڕۆکەوانەکە و دوو یاریدەدەری لە هێلیکۆپتەرەکەدا بوون و گیانیان لەدەستدا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ