جیهان
دۆناڵد ترەمپ، سەرۆکی ئەمریکا لەکاتی واژۆ کردنی فەرمانێکی جێبەجێکاری بۆ دروستکردن و دەرکردنی 'کارتی ئاڵتوونیی ترەمپ'. وێنە: AFP
رووداو دیجیتاڵ
سەرۆکی ئەمریکا دوو فەرمانی جێبەجێکردنی واژۆ کرد کە بە شێوەیەکی بەرچاو سیاسەتی کۆچبەری لە ئەمریکا دەگۆڕن. فەرمانی یەکەم پرۆگرامی ڤیزای کارتی زێڕینە و تایبەتە بە وەبەرهێنەرە دەوڵەمەندەکان، لە کاتێکدایە فەرمانی دووەم بڕێکی زیاتر دەسەپێنێت بەسەر داواکارانی ڤیزای کارکردن لە ئەمریکا.
"کارتی زێڕین: ڤیزایەکی خێرا بۆ دەوڵەمەندەکان"
بەپێی فەرمانە نوێیەکەی ترەمپ، پرۆگرامی نوێی "کارتی زێڕین" رێگە بەو هاووڵاتییە بیانییانە دەدات کە لانیکەم یەک ملیۆن دۆلار دەدەنە وەزارەتی بازرگانیی ئەمریکا، ئەمەش پڕۆسەی وەرگرتنی ڤیزای ئەمریکایان بۆ خێراتر دەکات. بۆ کۆمپانیاکانیش، ئەگەر بڕی دوو ملیۆن دۆلار بدەن، دەتوانن سپۆنسەری هەر کەسێک بکەن، تاوەکو ببێتە خاوەنی کارتی زێڕینی ئەمریکا.
وەزارەتی بازرگانیی ئەمریکا رایگەیاندووە، نزیکەی 80 هەزار کارتی زێڕین بەردەست دەبێت و پرۆگرامەکە هێشتا لە قۆناخی جێبەجێکردندایە.
هاوارد لوتیک، وەزیری بازرگانیی ئەمریکا ئاماژە بەوە دەکات، خاوەن کارتی زێڕین دوای پشکنینی ورد لەلایەن وەزارەتەکانی دەرەوە و ئاسایشی نیشتمانی و پێدانی بڕی 15 هەزار دۆلار بۆ پشکنین، وەکو دانیشتووی هەمیشەیی یاسایی ئەمریکا، ناسراو بە هەڵگری "کارتی سەوز" یان "گرین کارد"، هەژمار دەکرێن.
ئەم بەرنامەیە شوێنی ڤیزاکانی جۆرەکانی EB-1 و EB-2 دەگرێتەوە، کە پێشتر تایبەت بوون بە کەسانی "دەستڕەنگین و لێهاتوو." لەوبارەیەوە وەزیری بازرگانی دەڵێت، "بەخشینی ملیۆنێک دۆلار بە ئەمریکا بەڵگەیەکی باشە لەسەر بەها و نرخی ئەو کەسە."
سەرەڕای کارتی زێڕین، ئیدارەی ترەمپ بیر لە پێشکێشکردنی "کارتی پلاتینۆم" دەکاتەوە بە بڕی پێنج ملیۆن دۆلار، کە رێگە بە داواکار دەدات بۆ ماوەی 270 رۆژ لە ئەمریکا بمێننەوە بەبێ پێدانی باج لەسەر داهاتەکانیان کە لە دەرەوەی ئەمریکا بەدەستیان هێناوە.
بەڵام ئەم بەرنامەیە هیچ ئاسانکارییەک بۆ بەدەستهێنانی وڵاتینامەی ئەمریکا ناکات و بۆ پەسندکردنی بەرنامەکەش، پێویستی بە بڕیاری کۆنگرێسە.
"100 هەزار دۆلار بۆ ڤیزای کار"
لە فەرمانێکی دیکەدا، ترەمپ بڕی پێدانی ڤیزەی کارکردنی لە ئەمریکا زیاد کرد و 100 هەزار دۆلاری سەپاند بەسەر ئەو کەسانەی داوای ڤیزای کار دەکەن، کە بە ڤیزای (H-1B) ناسراوە.
ئەو ڤیزایە، تایبەتە بەو کەسانەی دەیانەوێت لە ئەمریکا مافی کارکردنیان هەبێت و رێگە بە دەیان هەزار کەس دەدات تاوەکو 6 ساڵ لە ئەمریکا بژین و کار بکەن.
رەخنەگرانی ئەو بڕیارە نوێیەی ئیدارەی ترەمپ دەڵێن، ئەو ڤیزایانە رێگە بە خاوەنکارەکان دەدات مافی کرێکارانی بیانی پێشێل بکەن و بە مووچەیەکی کەمتر لە کرێکارە ئەمریکییەکان دایان بمەزرێنن.
لە بەرامبەردا، لایەنگرانی بەرنامەکە جەخت لەسەر ئەوە دەکەنەوە، ئەو گۆڕانکارییە گرنگە، بەتایبەتی لە بواری تەکنەلۆجیادا، بەوەی کاتێک دۆزینەوەی کرێکارانی خۆماڵی لەو بوارەدا قورس دەبێت. کۆمپانیا زەبەلاحەکانی وەک ئەمازۆن، هەزاران داواکاریی بۆ هێزی کاری بیانی پێشکێش دەکەن و داهاتی زیاتر بۆ ئەمریکا دابین دەکەن.
لە وەڵامی پرسیارێکدا سەبارەت بە کاردانەوەی کۆمپانیا تەکنەلۆژییەکان، ترەمپ بە رۆژنامەڤانانی راگەیاند، "پێموایە زۆر دڵخۆش دەبن، چونکە دەتوانین ئەو کەسانە لە وڵاتەکەمان بهێڵینەوە کە کەسانی زۆر بەرهەمدارن و لە زۆر حاڵەتدا، ئەو کۆمپانیایانە پارەیەکی زۆر بۆ ئەوان دەدەن و ئەمەش مایەی دڵخۆشییە."
مشتومڕەکان لەسەر ڤیزای کار
ڤیزای H-1B لە ساڵی 1990 دامەزراوە، بە مەبەستی راکێشانی کەسانی شارەزا و لێهاتوو بۆ پیشە جۆراوجۆرەکان، بەتایبەتی لە بوارەکانی زانست، تەکنەلۆجیا، ئەندازیاری و بیرکاری؛ بەڵام رەخنەگران دەڵێن، پرۆگرامەکە گۆڕاوە بۆ رێگایەک بۆ دامەزراندنی کرێکارانی بیانی بە مووچەی کەمتر، کە زۆرجار ناگاتە نزیکەی 100 هەزار دۆلار لە ماوەی ساڵێکدا.
ئەم ساڵ کۆمپانیای ئەمازۆن بە وەرگرتنی زیاتر لە 10 هەزار ڤیزای کار بۆ کرێکاری بیانی، پێشەنگ بووە؛ دواتر کۆمپانیاکانی وەک تاتا کونسوڵتانسی، مایکرۆسۆفت، ئەپڵ و گۆگڵ دێن. ویلایەتی کالیفۆرنیاش زۆرترین ژمارەی کرێکارانی بیانیی هەیە.
یەکێک لە کەیسە بەنێوبانگەکانی وەرگری ڤیزای کرێکاری ئەمریکا، مێلانیا ترەمپ، خانی یەکەمی ئەمریکایە، کە لە تشرینی یەکەمی ساڵی 1996 ڤیزای کاری وەرگرت، بە مەبەستی کارکردنی وەکو مۆدێل، بەڵام دواتر ترەمپی ناسی و ئێستاش بووەتە خانمی یەکەمی ئەو وڵاتە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ