هەڵەیەک روویدا! دووبارە هەوڵبدە
مەهدی فەرەج، پەیامنێری رووداو و دیمەنێکی شاری ئیۆ لە چین
رووداو - چین
کاریگەرییەکانی قەیرانی دارایی و دواکەوتنی مووچە لە هەرێمی کوردستان، سنوورەکانی تێپەڕاندووە و بەرۆکی بازرگانە کوردەکانی شاری ئیۆی چینیشی گرتووەتەوە. بازرگانانی ئەو شارە دەڵێن، بەهۆی دۆخی دارایی عێراق و هەرێمی کوردستان و شەڕی ناوچەکەوە، جووڵەی بازرگانی وەک ساڵانی رابردوو نییە.
ئیۆ کە بە "بەهەشتی کڕیاران" و گەورەترین ناوەندی کۆفرۆشی لەسەر ئاستی جیهان ناسراوە، بووەتە شوێنی کارکردنی ژمارەیەکی زۆر لە بازرگانانی کورد. نزار سامی، یەکێکە لەو بازرگانانە کە 8 ساڵە لە دهۆکەوە رووی لەو شارە کردووە و کاری هەناردەکردنی کاڵایە بۆ کوردستان.
نزار سامی، سەبارەت بە دۆخی بازاڕ بە تۆڕی میدیایی رووداوی راگەیاند: "رەوشی بازرگانیی ئەم ساڵ تاوەکو ئێستا مامناوەند بووە. بەهۆی شەڕ و ئاڵۆزییەکانی رۆژهەڵاتی ناوەڕاست و دۆخی دارایی حکومەتی عێراق و هەرێمی کوردستان، بەتایبەتی دواکەوتنی دابەشکردنی مووچە، زیان و کاریگەریی زۆری لەسەر بازاڕ هەبووە."
جگە لە قەیرانی دارایی ناوخۆیی، گرژییە هەرێمییەکانیش هۆکارێکی دیکەی سستیی بازاڕن. ئالان تاڵیب، بازرگانێکی دیکەی کوردە لە ئیۆ و دەڵێت: "ئەم ساڵ رەوشی بازرگانی زۆر باش نییە، هۆکارەکەشی دۆخی سیاسی و ئابووریی لای خۆمانە. مووچە باش نییە و ئەو شەڕەی ئێرانیش بەڕاستی کاریگەریی زۆری لەسەر بازرگانیی ئێمە داناوە."
سەرکەوت عەبدولقادر، کە بازرگانێکی دیکەی دانیشتووی ئەو شارەیە، بۆچوونێکی جیاوازتری هەیە و ئاماژە بەوە دەکات، بازاڕ تووشی جۆرێک لە وەستان بووە و دەڵێت: "بە نیسبەت ئێمەوە بازاڕەکە جێگیرە، نە زۆر زیاد دەکات و نە زۆر کەمیش دەکات؛ بە حوکمی ئەم شەڕ و كێشانەی ناوچەکە لە کەمییە، بەڵام کەمبوونەوەکە زۆر نییە."
ئیۆ؛ لە شارۆچکەیەکی بچووکەوە بۆ ناوەندی بازرگانیی جیهان
ئاسانکاری و پاڵپشتیی حکومەتی چین بۆ ئیۆ وایکردووە ببێتە "شاری بیانییەکان". داهاتی ئەو شارە تەنیا لە 9 مانگی یەکەمی ئەم ساڵدا 88 ملیار دۆڵار بووە و قەبارەی ئاڵوگۆڕی بازرگانیی چین لەگەڵ عێراقیش ساڵانە زیاتر لە 55 ملیار دۆلارە.
ناوەندی 'فوتیان' کە دڵی بازرگانیی ئیۆیە، بووەتە خەونی هاتنی هەر بازرگانێکی کاڵای ورد و مامناوەند؛ سەنتەرەکە 100 هەزار دووکانی تێدایە و هەموو جۆرە کاڵایەکی تێدا دەستدەکەوێت.
ئەم پێشکەوتنەی ئیۆ لەکاتێکدایە، تاوەکو کۆتایی هەشتاکانی سەدەی رابردوو، شارێکی بچووک بووە و تەنیا بازرگانی بە "پەڕی مریشک و قامیشی شەکر"ـەوە تێدا کراوە، بەڵام ئێستا بەهۆی یاساکانی کارکردن و پاڵپشتیی حکومەتی خۆجێی، بووەتە شارێکی مۆدێرن و پەیوەندیی بازرگانی لەگەڵ 200 وڵات و هەرێمی جیهاندا هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ