رووداو دیجیتاڵ
وەزیری ناوخۆی سویسرا سێ پارچەی شوێنەواری عێراقی رادەستی وەزیری دەرەوەی عێراق کردەوە. وەزارەتەکە دەڵێت: "گومان دەکەین بە رێگەیەکی نایاسایی لە عێراق برابێتنە دەرەوە."
رۆژی هەینی، 24-05-2024 لە رێوڕەسمێکدا لەنێو وەزارەتی رۆشنبیریی سویسرا لە شاری بێرن؛ ئێلیزابێس بۆمێ شنایدەر، وەزیری ناوخۆی سویسرا سێ پارچە شوێنەواریی عێراقی رادەستی فوئاد حوسێن، وەزیری دەرەوەی عێراق کرد.
سێ پارچەکە پێکهاتبوون لە نیمچە پەیکەرێک و دوو تابلۆی هەڵکۆڵراوی میزۆپۆتامیا کە تەمەنیان لە نێوان هەزار و 700 بۆ دوو هەزار و 800 ساڵە.
وەزارەتی دەرەوەی عێراق لەوبارەیەوە رایگەیاند: "لەچوارچێوەی دیپلۆماسییەتی گەڕاندنەوەی شوێنەوارەکانی عێراق، کە لەلایەن وەزارەتی دەرەوە بەگەڕخرا، ئەمڕۆ هەینی بەڕێز فوئاد حوسێن، وەزیری دەرەوە و جێگری سەرۆکوەزیرانی عێراق سێ پارچەی زۆر گرانبەهای شوێنەواری عێراقی وەرگرتەوە. پارچەکان بۆ سەردەمی دێرینی ئاشوورییەکان دەگەڕێنەوە."
بەگوێرەی وەزارەتی ناوخۆی سویسرا، سێ پارچە شوێنەوارەکە لە سێ پرۆسەی فەرمیی کنە و پشکنینی ساڵانی 1857، 1959 و 1976 لە میزۆپۆتامیا، عێراقی ئێستا دۆزراونەتەوە.
وەزارەتی ناوخۆی سویسرا لە راگەیێندراوێکدا دەڵێت: "سێ پارچە شوێنەوارییەکە گرنگییان زۆرە، دوای ئەوەی سێ پارچەکە دۆزراونەتەوە، گومان دەکەین بە رێگەیەکی نایاسایی لە عێراق برابێتنە دەرەوە."
وەزارەتی ناوخۆی وڵاتە ئەورووپییەکە ئەوەشی ئاشکرا کردووە، ساڵی پار لە ئۆپەراسیۆنێکی دژەتاواندا لە کانتۆنی جنێڤ دەستبەسەر سێ پارچەکە و 43 پارچەی دیکەدا گیراوە.
لەنێو پارچە شوێنەوارییەکاندا، دوو تابلۆی هەڵکۆڵراوی ئاشووری هەن کە بۆ سەدەی هەشتەمی پێش زایین دەگەڕێنەوە و لە شاری دێرینی نەمروود لە باشووری موسڵ دۆزراونەتەوە.
وەزارەتی دەرەوەی عێراق دەڵێت: "نیمچە پەیکەرەکە پەیکەری خواوەندی خۆری ئاشوورییەکانە."
وەزارەتەکەی سویسرا دەڵێت: "پارچە کولتوورییەکانی میزۆپۆتامیا، کە بە لانکەی شارستانییەت ناسراون، یەکێکن لەو کەلوپەلانەی عێراق کە مەترسیی لەنێوچوونیان لەسەرە."
لە هەنگاوێکی هاوشێوەدا، رۆژی 17-04-2024 بە ئامادەبوونی بەرپرسانی وەزارەتی دەرەوەی ئەمریکا و ئەلینا رۆمانۆوسکی، باڵیۆزی ئەو وڵاتە لە عێراق، پەیکەرێکی شوێنەواریی سەردەمی سۆمەرییەکان رادەستی محەممەد شیاع سوودانی، سەرۆکوەزیرانی عێراق کرایەوە.
سوودانی شوێنەوارەکەی بە "گرنگ" ناوبرد و گوتی، "دەمەوێت بە ناوی گەل و حکومەتی عێراقەوە سوپاس و پێزانین بۆ مۆزەخانەی نیویۆرک دەربڕم کە کاری لەسەر گەڕاندنەوەی ئەم شوێنەوارە کردووە."
عێراق مێژوویێکی دێرین و دەوڵەمەندی هەیە، لەنێوان 2000 بۆ 5000 ساڵ لەمەوبەر شارستانییەتی سۆمەری، ئەکەدی، بابلی و ئاشوورییەکان بووە، بەڵام لەکاتی جەنگەکاندا بەردەوام پارچە شوێنەوارەکانی کراونەتە ئامانجی دزین و تاڵانکردن و وێرانکردن.
لە 2003 تاوەکو 2017 نزیکەی 120 هەزار پارچە شوێنەواری دزران، لە 2019ەوە عێراق توانیوییەتی نزیکەی 35 هەزار پارچەی شوێنەواری بگەڕێنێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ