رووداو دیجیتاڵ
بەرپرسانی تایلەند هێزەکانی کەمبۆدیا بە هێرشکردنە سەر بنکەیەکی سەربازیی و نەخۆشخانەیەک و کوشتن و بریندارکردنی خەڵکی وڵاتەکەیان تۆمەتبار دەکەن و دەڵێن، دەبێت بەرپرسیارێتییەکەی هەڵبگرێت
رۆژی پێنجشەممە، 24ـی تەممووز، وەزارەتەکانی دەرەوە و تەندروستیی تایلەند رایانگەیاند، کە هێزەکانی کەمبۆدیا هێرشیان کردووەتە سەر "بنکەیەکی سەربازی" و نەخۆشخانەیەک و بەهۆیەوە 11 هاووڵاتیی سڤیل گیانیان لەدەستداوە و ژمارەیەکی دیکەش بریندار بوون.
بەگوێرەی ئاژانسی هەواڵی رۆیتەرز، سۆمساک تێپسوتین، وەزیری تەندروستیی تایلەند، سەرکۆنەی هێرشەکەی کەمبۆدیای کردووە و رایگەیاندووە، کردارێکی لەو شێوەیە "دەکرێت وەک تاوانی جەنگ هەژمار بکرێت و دەبێت بەرپرسیارێتییەکەی هەڵبگرێت."
وەزارەتی دەرەوەی تایلەند پێشتریش رایگەیاندبوو، هێزەکانی کەمبۆدیا بەیانیی رۆژی پێنجشەممە "تۆپبارانێکی قورسیان" کردووەتە سەر بنکەیەکی سەربازیی تایلەند و ناوچە سڤیلنشینەکانیان کردووەتە ئامانج، ژمارەیەک سڤیل بوونە قوربانی.
چین یەکێکە لە هاوپەیمانەکانی کەمبۆدیا و بە ملیاران دۆلار وەبەرهێنانی لەو وڵاتەدا کردووە، نیگەرانی خۆی لە پەرەسەندنی گرژییەکان دەربڕی و داوای ئاسایبوونەوەی دۆخەکە و رێگەگرتن لە پەرەسەندنی گرژییەکان دەکات.
ئاژانسی فرانس پرێس لە زاری گۆ جیاکون، گوتەبێژی وەزارەتی دەرەوەی چینەوە دەڵێت: "ئێمە نیگەرانیی قووڵی خۆمان لەبارەی پێشهاتەکان دەردەبڕین و هیوادارین هەردوولا بتوانن کێشەکان لەڕێگەی دیالۆگ و راوێژەوە چارەسەر بکەن."
گوتەبێژەکەی وەزارەتی دەرەوەی چین جەختی لەوەش کردەوە کە وڵاتەکەی "هەڵوێستێکی دادپەروەرانە و بێلایەنانە"ـی دەبێت و بەردەوام دەبێت "لە هەوڵەکانی بۆ برەودان بە ئاشتی و دیالۆگ و رۆڵێکی بنیاتنەرانە دەگێڕێت لە هێورکردنەوەی دۆخەکە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ