جیهان
یەکێتیی ئەورووپا وەزیری بازرگانیی ناوخۆ، وەزیری نەوت و وەزیری دەوڵەتی سووریا دەخاتە لیستی سزاکانی.
رووداو دیجیتاڵ
بە تۆمەتی بەشداریکردن لە سەرکوتکردن و پێشێلکاریی مافی مرۆڤ، یەکێتیی ئەورووپا سزای خستە سەر سێ وەزیری حکومەتی سووریا.
رۆژی دووشەممە 25-11-2024 ئەنجوومەنی یەکێتیی ئەورووپا سزای خستەسەر سێ وەزیری کابینەی بەشار ئەسەد، سەرۆککۆماری سووریا. یەکێتیی ئەورووپا رایگەیاند، سێ وەزیرەکە لە "سەرکوتکردن و پێشێلکردنی مافەکانی مرۆڤ" بەشدار بوون.
ئەو سێ کەسەی خراونەتە نێو لیستی سزاکان بریتین لە: لوئەی عیمادەدین موناجید، وەزیری بازرگانیی ناوخۆ و پاراستنی بەکاربەر؛ فیراس حەسەن قەدوور، وەزیری نەوت و سەرچاوە کانزاییەکان و ئەحمەد محەممەد بوستاجی، وەزیری دەوڵەت.
یەکێتیی ئەورووپا دەڵێت: "ئەو وەزیرانە وەکو ئەندامی حکومەت، بەرپرسیارێتیی سەرکوتکردن و پێشێلکارییە بەردەوامەکانی حکومەتی سووریا هەڵدەگرن، لە دژی خەڵکی سڤیل."
یەکێتیی ئەورووپا دەستبەسەر هەر سامانێکی ئەو سێ کەسە دەگرێت کە لە ئەورووپا هەیانبێت و قەدەخەی گەشتکردنیشیان دەخاتەسەر. هەروەها، بەگوێرەی یاسای یەکێتیی ئەورووپا هیچ پارەدارکردنێک و یارمەتییەکی ئابووریی ئەورووپا ئەو کەسە سزادراوانە ناگرێتەوە.
یەکێتیی ئەورووپا تاوەکو ئێستا 318 کەس و 86 دامەزراوەی سووریای خستووەتە نێو لیستی سزاکانییەوە، "کە پەیوەندییان بە رژێمی ئەسەدەوە هەیە."
یەکێتیی ئەورووپا جەختی لەوە کردەوە، "تاکە رێگەی ئاشتیی بەردەوام بۆ سووریا بریتییە لە چارەسەری سیاسی، کە هاوتەریبی پەیماننامەی 2254ـی ساڵی 2015ـی ئەنجوومەنی ئاسایشی نەتەوە یەکگرتووەکان بێت. یەکێتیی ئەورووپا سەرکۆنەی سیاسەتی سەرکوتکردنی بەردەوامی رژێمی سووریا و پێشێلکارییەکانی دژی خەڵکی سڤیل دەکات."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ