جیهان
دەروونناسەکە راپرسیێکی لەگەڵ 500 خوێندکاری زانکۆ کردووە بۆ ئەوەی بزانێت چۆن لە ئۆتۆمبێلە دەنگبەرزەکان دەڕوانن
رووداو دیجیتاڵ
چەند جار بەسەرت هاتووە لە شوێنێک بە ئارامی بۆ خۆت دانیشتووی یان بە رێگەدا دەڕۆیت و لە پڕێکدا دەنگی بەرزی ئەگزۆزی دڕاوی ئۆتۆمبێلێک یان ماتۆرسکیلێک، راتدەچڵەکێنێت و ئارامییەکەت لێ تێکدەدات؟
لێکۆڵینەوەیەکی نوێ دەڵێت، ئەوانەی حەز بەو دەنگەی ئۆتۆمبێل و ماتۆرسیکل دەکەن، کێشەی دەروونییان هەیە و لەو جۆرانەن کە چێژ لە ئازاردانی کەسانی دیکە وەردەگرن.
لێکۆڵینەوەکە لەلایەن دەروونناس جولی ئەیتکن شێرمەر، مامۆستای زانکۆی وێسترن ئۆنتاریۆی کەنەدا کراوە و لە گۆڤاری نێودەوڵەتیی Current Issues in Personality Psychology بڵاوکراوەتەوە.
دەروونناسەکە راپرسیێکی لەگەڵ 500 خوێندکاری زانکۆ کردووە بۆ ئەوەی بزانێت چۆن لە ئۆتۆمبێلە دەنگبەرزەکان دەڕوانن و کەسایەتییان چ رەنگدانەوەیەکی لەسەر دەنگی ئۆتۆمبێلەکانیان هەیە.
لە ئەنجامدا دەرکەوتووە، ئەوانەی ساڵۆخەت (سیفەت)ـی سادیزمیان تێدایە، واتە ئەوانەی چێژ لە ئازاردان و سووکایەتیپێکردنی کەسانی دیکە وەردەگرن، بە تایبەتیش چێژی سێکسی، زیاتر حەز بە ئۆتۆمبێلی دەنگ بەرز دەکەن، بە هەمانشێوەی ئەوانەی دەروون پەشێو و دەروون ناڕێکن (ئەوانەی ناتوانن جڵەوی کاردانەوە و رەفتارەکانیان بکەن).
دەروونناسەکە وا لێکیدەداتەوە؛ ئەو کەسانەی بە ئەنقەست دەستکاری ئەگزۆزی ئۆتۆمبێل و ماتۆرسیکلەکانیان دەکەن بۆ ئەوەی ژاوەژاوی بەرز دەرکەن، چێژ لە ترساندنی خەڵک یان راکێشانی سەرنجیان دەبینن.
لێکۆڵینەوەکە هەروەها دەریخستووە کە گەنجەکان لە رەگەزی نێر زیاتر حەزیان بەو جۆرە ئۆتۆمبێلانەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ