رووداو دیجیتاڵ
سەرۆکی ئەمریکا لە پۆستێکدا لە تۆڕی کۆمەڵایەتیی "ترووس سۆشیاڵ" رایگەیاند، تۆم باراک، باڵیۆزی ئێستای ویلایەتە یەکگرتووەکانی ئەمریکا لە تورکیا، وەک نێردەی نوێی وڵاتەکەی بۆ کاروباری سووریا دەستنیشانکراوە.
ترەمپ لە بڵاوکراوەکەیدا نووسی: "خۆشحاڵم رایدەگەیێنم تۆم باراک، باڵیۆزی ویلایەتە یەکگرتووەکانمان لە تورکیا، وەک نێردەمان بۆ سووریا کاردەکات."
سەرۆکی ئەمریکا ئاماژەی بەوەداوە کە باراک "لەوە تێدەگات دەرفەتی گەورە هەیە لە کارکردن لەگەڵ سووریا بۆ راگرتنی تووندڕۆیی، باشترکردنی پەیوەندییەکان و دابینکردنی ئاشتی لە رۆژهەڵاتی نێوەڕاست."
دۆناڵد ترەمپ لە کۆتایی پۆستەکەیدا جەختی لەوە کردووەتەوە کە "پێکەوە، ئەمریکا و جیهان سەلامەت دەکەینەوە."
دەستنیشانکردنی باراک وەک نێردەی نوێ بۆ سووریا لەکاتێکدایە، دۆخی سووریا و پەیوەندییەکانی ئەمریکا لەگەڵ لایەنە جیاوازەکانی ئەو وڵاتە لە قۆناخێکی هەستیاردایە.
نێردەی نوێی ئەمریکا بۆ سووریا ناوی تۆماس جۆزێف باراک جونیەرە و لە 28-04-1947 لە ویلایەتی کالیفۆرنیا لەدایکبووە.
باراک سەرمایەدار و وەبەرهێنەرێکی ئەمریکایە و چەندین ساڵە هاوڕێیەکی نزیکی ترەمپە و لە هەڵمەتەکانی هەڵبژاردن پارەیەکی زۆری بۆ کۆکردەوە.
لە ساڵی 2016، باراک راوێژکاری هەڵمەتی هەڵبژاردنی ترەمپ بوو، دواتر وەک سەرۆکی لیژنەی سوێندخواردنی ترەمپ لە خولی یەکەمی سەرۆکایەتیدا دەستبەکاربوو.
تۆم باراک لە کانوونی یەکەمی 2024 وەک باڵیۆزی ئەمریکا لە تورکیا دەستنیشانکرا. دایپر و باپیری باراک بە رەچەڵەک خەڵکی لوبنانن و لەوێوە بۆ ئەمریکا کۆچیان کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ