جیهان
دزەکان ئەم ئۆتۆمبێلی بەرزکەرەوەیان بەکارهێناوە بۆ گەیشتن بە بالکۆنی مۆزەخانەکە. وێنە: Paul Dza/Sipa/Shutterstock
رووداو دیجیتاڵ
داواکاری گشتیی فەرەنسا رایگەیاند، چوارەم ئەندامی ئەو باندەیان تۆمەتبار کردووە کە مانگی رابردوو گەورەترین دزییان لە مۆزەخانەی لۆڤەر کرد و خشڵ و زێڕیان برد.
رۆژی هەینی، داواکاری گشتیی پاریس وردەکاریی دەستگیرکردنەکەی ئاشکرا کرد.
رووداوەکە 19ـی تشرینی یەکەمی ئەم ساڵ روویدا. باندەکە بە رۆژی رووناک و تەنیا لە حەوت خولەکدا چوونە نێو بەناوبانگترین مۆزەخانەی جیهان و بە بەهای 102 ملیۆن دۆلار خشڵ و گەوهەریان دزی و بە سکووتەر هەڵاتن.
لۆر بێکوا، داواکاری گشتیی پاریس رایگەیاند، تۆمەتباری چوارەم پیاوێکی تەمەن 39 ساڵە و لەدایکبووی ناوچەی سێن سان دێنیسـی دەوروبەری پاریسە.
بێکوا لە راگەیێندراوێکدا دەڵێت: "ئەم پیاوە پێشتر شەش جار سزادراوە و لای دادگەکان بە تاوانی جۆراوجۆری وەک بەڕێوەبردنی کاری لەشفرۆشی، لێخوڕین بەبێ مۆڵەت و وەرگرتنی کەلوپەلی دزراو ناسراوە."
دوایین ئەندامی باندەکە رۆژی سێشەممە لە کارگەیەکی بیناسازی لە شاری لاڤالـی رۆژئاوای فەرەنسا دەستگیرکراوە. ئێستا هەر چوار ئەندامی باندەکە دەستگیرکراون و تۆمەتی "دزیی رێکخراو" و "پیلانگێڕی بۆ تاوان"یان ئاراستە کراوە.
لێکۆڵینەوەکان بۆ دیاریکردنی رۆڵی هەر یەکێک لە ئەندامانی باندەکە بەردەوامە.
دزەکان بەرزکەرەوەیەکیان بردبوو کە پەیژەکەی درێژ دەبێتەوە و لەژێر گەلەریی ئەپۆلۆ رایانگرتبوو کە خشڵی خێزانی ئیمپراتۆرەکانی فەرەنسای لێیە.
بەپێی لێکۆڵینەوەکان، ئەوان بە پەیژەکە سەرکەوتوون، پەنجەرەیەکیان شکاندووە و بە کۆسەرە شووشەی ئەو جامخانەیەیان بڕیوە کە خشڵ و گەوهەرەکانی تێدا نمایش بووە.
سێ تۆمەتبارەکەی دیکە تەمەنیان 35، 37 و 39 ساڵە. دووانیان چوونەتە ژوورەوە و دووانیان لە دەرەوە چاودێرییان کردووە.
لەکاتی هەڵاتندا، دزەکان تاجێکیان لەدەست کەوتووەتە خوارەوە کە هی ئیمپراتۆر ئۆجینی، هاوژینی ناپلیۆنی سێیەم بووە و بە ئەڵماس و زومرود نەخشێنراوە.
بەڵام توانیویانە هەشت پارچەی گرانبەهای دیکە ببەن، لەنێویاندا ملوانکەیەکی ئەڵماس و زومرود کە ناپلیۆنی یەکەم پێشکێشی هاوژینی دووەمی، ئیمپراتۆر ماری لویسـی کردبوو.
تاوەکو ئێستا زێڕەکان دیار نین و ئەوانەشی فەرمانی دزییەکەیان داوە دەستگیرنەکراون.
میدیای فەرەنسا بڵاویکردەوە، یەکێک لە تۆمەتبارەکان گوتوویەتی لەلایەن دوو پیاوەوە بەکرێ گیراون و پێیانگوتوون گرێبەستەکە بۆ بڕینی نووسینگەیەکی بازرگانیی ئاساییە، نەوەک مۆزەخانە.
ژنێکی تەمەن 38 ساڵیش کە هاوژینی یەکێک لە دزەکانە، بە تۆمەتی هاوبەشیکردن لە تاوان دەستگیرکراوە و بە کەفالەت ئازاد کراوە.
لۆرێنس دێس کارس، بەڕێوەبەری مۆزەخانەی لۆڤەر بەڵێنی داوە رێوشوێنی ئەمنی تووندتر بکات، لەوانە دانانی پۆلیس لەنێو مۆزەخانەکە و جێگیرکردنی 100 کامێرای نوێی چاودێری.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ