جیهان
ئەمریکییەکان پێیانوایە چین تەکنەلۆژیاکە بۆ کاری سیخوڕی بەسەر وڵاتانی بەکارهێنەرەوە بەکاردەهێنێت
رووداو - هەولێر
وەزیری دەرەوەی ئەمریکا دەڵێت، سەرۆکوەزیرانی بەریتانیای لە كڕینی تەکنەلۆجیای 5G لە کۆمپانیای هواویی چینی ئاگادارکردووەتەوە کە خۆیان بەدووربگرن، چونکە کڕینی ئەو تەکنەلۆژیایە "مەترسیی گەورە" لەسەر ئاسایشی بەریتانیا دروستدەکات.
رۆژی سێشەممە 28-01-2020، بەریتانیا رێگەی بە کۆمپانیای هواوی دا کە بە شێوەیەکی سنووردار لە تەکنەلۆژیای 5Gـدا لە وڵاتەکەیدا دەست بە وەبەرهێنان بکات، چونکە بە گوتەی بەرپرسە بەریتانییەکان، تەکنەلۆژیاکە رۆڵی کاریگەر لە بەرەوپێشبردنی ژێرخانی ئابووریی وڵاتەکەیاندا دەگێڕێت.
پێشتریش بەرپرسانی ئەمریکا هۆشدارییان دابووە بەریتانییەکان تاوەکو ئەو تەکنەلۆژیایە لە کۆمپانیا چینیەکە نەکڕن، چونکە پێیانوایە چین تەکنەلۆژیاکە بۆ کاری سیخوڕی بەسەر وڵاتانی بەکارهێنەرەوە بەکاردەهێنێت.
تەکنەلۆژیای 5G یان خزمەتگوزاریی ئینتەرنێتیی نەوەی پێنجەم، نوێترین جۆری هێڵی ئینتەرنێتە کە خێراییەکی زۆری هەیە و 50 مێگابایت تاوەکو دوو گێگابایت لە یەک چرکەدا دەگوازێتەوە و پێشبینیدەکرێت کە پەرەی پێبدرێت و خێراکەی بگەیێنرێتە 100 گێگابایت لە چرکەیەکدا. بەوەش 100 جار لە هێڵی 4G خێراتر دەبێت.
ئەو پەرەدانە بە خێرایی ئینتەرنێت سوودی زۆری دەبێت بۆ ژیریی دەستکرد وەکو، کۆنترۆڵکردنی ئامێرەکان لە دوورەوە، ماڵی زیرەک، چاودێریی تەندروستی، خێراکردنی پەیوەندی و زیادکردنی توانای خۆبەڕێوەبردنی رۆبۆت و ئامڕازەکانی گواستنەوە بەبێ دەستکاریی مرۆڤ. تاوەکو ئێستا تەنیا کۆمپانیای هواویی چینی لە توانایدایە ئەم تەکنەلۆژیایە بەشێوەیەکی کاریگەر بەرهەمبهێنێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ