هەڵەیەک روویدا! دووبارە هەوڵبدە
شەیدا سوهرابی بە ژمارە 150 بەربژێری هاوپەیمانیی نیشتمانیی فینلەندایە بۆ پەرلەمانی وڵاتەکە
رووداو - فینلەندا
کچە کوردێکی خەڵکی رۆژهەڵاتی کوردستان کە ساڵانێکی زۆرە لە فینلەندا دەژی، ئێستا بەربژێرە بۆ پەرلەمانی ئەو وڵاتە و دەستی بە کەمپەینی بانگەشەی هەڵبژاردن کردووە و دەڵێت، هەوڵی رازیکردنی دەنگدەران دەدات بۆ ئەوەی بگاتە پەرلەمانی وڵاتەکە.
شەیدا سوهرابی بە ژمارە 150 بەربژێری هاوپەیمانیی نیشتمانیی فینلەندایە بۆ پەرلەمانی وڵاتەکە لە بازنەی هێڵسنکی و لەگەڵ چەند هاوڕێیەکی دەستی بە بانگەشەی هەڵبژاردن کردووە. ئەو کە پێشتر لە شارەوانیی شارەکە کاری کردووە، شار و شارۆچەکانی ئەو وڵاتە دەگەڕێت و دەڵێت، هەموو هەوڵێک دەدات بۆ رازیکردنی دەنگدەرانی و گەیشتن بە پەرلەمان.
شەیدا سوهرابی، کچە کوردی دانیشتووی فینلەندا و بەربژێری هاوپەیمانیی نیشتمانی بۆ پەرلەمانی وڵاتەکە بە تۆڕی میدیایی رووداوی گوت، "کاتی خۆی باوکم ئامۆژکاری کردم و گوتی: هەر شتێک دەکەی بە جوانی، بە رێکی، بە باشی بیکە، ئەگەر نا مەیکە. منیش لەو چوارچێوەیە ئیش دەکەم و بڕوای تەواوم بەو قسەیە هەیە."
شەیدا لە شارەوانیی هێڵسنکی پڕۆژەیەکی بۆ کورد هەیە و دەڵێت، "پڕۆپۆزەلێکم کردووە بۆ ئەوەی جادەیەک هەبێ بە ناوی زمانی کوردییەوە، هەشت کەس دەنگی داوە و ئیمزای کردووە، داوامکردووە کە چەند کەسێکی دیکەیش ئیمزای بکەن، بۆئەوەی بیبەمە پێشەوە کە جادەیەک هەبێ بە ناوی زمانی کوردی."
ئەو کچە کوردە لەگەڵ خێزانەکەی لە 20-04-1996، لە شاری روومادی لە عێراق بەرەو فینلەندا بەڕێکەوتن. لەو رۆژە بەدواوە ژیانی شەیدا گۆڕانکاریی بەسەردا هات و چاوی بە رووی جیهان کرایەوە.
شەیدا سوهرابی باس لەوە دەکات کە فینلەندا و کوردستان وەکو دایک و باوکن بۆ ئەو. دەشڵێت، "من فینلەندام خۆش دەوێ و من کوردێکی فینلەدیم، دڵم لای فینلەدایە، فینلەندا بۆ من و پەنابەران زۆر باش بووە."
لەنێو تیمی شەیدادا، کورد، فینلەندی و ئەفریقی و خەڵکی دیکەیش هەن. بڕیارە سەرەتای مانگی داهاتوو هەڵبژاردنی پەرلەمانی فینلەندا بکرێت و کە 2424 کەس کێبڕكێ بۆ 200 کورسیی پەرلەمانی وڵاتەکە دەکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ