وێنەی کۆنفرانسە رۆژنامەڤانییەکە
رووداو دیجیتاڵ
جێگری گوتەبێژی نەتەوە یەکگرتووەکان بە رووداوی راگەیاند، ئاگربەستی دەستبەجێی غەززە، گەیاندنی هاوکارییەکان، ئازادکردنی بارمتەکان و چارەسەری دوو دەوڵەتی خاڵی لەپێشینەی ئەوانن.
رۆژی سێشەممە، 30-09-2025 نامۆ عەبدوڵڵا، پەیامنێری رووداو لە نیویۆرک لە فەرحان حەق، جێگری گوتەبێژی نەتەوە یەکگرتووەکانی پرسی: "لەبارەی دەستەوارەکەی سەرۆک ترەمپ بۆ ئاشتی، گوتتان سکرتێری گشتی پێشوازی لێدەکات. ئایا سکرتێری گشتی پێی وایە پێشنیازێکی دادپەروەرانەیە بۆیە پێشوازی لێدەکات یان چ شتێکی دیاریکراو هەیە کە وا لە سکرتێری گشتی بکات پێشوازی لەو پێشنیازە بکات؟"
فەرحان حەق لە وەڵامدا گوتی: "ئەوەی ماوەیەکی زۆرە باسی دەکەین و سکرتێری گشتی دەیەوێ ببینێ بریتییە لە ئاگربەستێکی دەستبەجێ و هەمیشەیی، گەیشتنی هاوکاریی مرۆیی، ئازادکردنی بارمتەکان و هەروەها رێگەیەک بەرەو چارەسەری دوو دەوڵەتی. ئەوانە خاڵە لەپێشینەکانی ئێمەن. هیچ شتێکی دیاریکراوم نییە لەسەر خاڵەکانی پلانەکە بڵێم."
بە گوێرەی راگەیێندراوی کۆشکی سپی و پلانەکەی ترەمپ، دوای راگەیاندنی ئاگربەست، هەموو ئۆپەراسیۆنەکانی سوپای ئیسرائیل رادەگیرێن و لە کەرتەکەش دەکشێنەوە. رۆژانە هاوکاریی مرۆیی پێویست دەگەیێندرێتە ئەو ناوچەیەی فەلەستین و لەلایەن نەتەوە یەکگرتووەکان و رێکخراوە نێودەوڵەتییەکانەوە دابەش دەکرێ.
لە پلانەکەدا هاتووە، دوای جەنگ، غەززە لەلایەن دەسەڵاتێکی راگوزەر لەژێر سەرپەرشتیی ئەمریکا بە هاوبەشی لەگەڵ وڵاتانی ئەندام لە کۆمکاری عەرەبی و ئەورووپا بەڕێوەدەبرێ. حەماسیش نابێت وەکو گرووپێکی چەکدار لەو کەرتە بمێنێت و بەشداری دەسەڵات بکات؛ دەبێت چەکدارەکان وازبێنن یان رێگەیان پێدەدرێت غەززە جێبهێڵن.
دەقی پرسیار و وەڵامی نامۆ عەبدوڵڵا لەگەڵ فەرحان حەق
رووداو: نامۆ عەبدوڵڵام لە رووداوەوە. لەبارەی دەستەوارەکەی سەرۆک ترەمپ بۆ ئاشتی، گوتتان سکرتێری گشتی پێشوازی لێدەکات. ئایا سکرتێری گشتی پێی وایە دادپەروەرانەیە بۆیە پێشوازی لێدەکات یان چ شتێکی دیاریکراو هەیە کە وا لە سکرتێری گشتیی بکات پێشوازی لەو پێشنیازە بکات؟
فەرحان حەق، جێگری گوتەبێژی نەتەوە یەکگرتووەکان: ئەوەی کە ماوەیەکی زۆرە باسی دەکەین و سکرتێری گشتی دەیەوێ ببینێ بریتییە لە ئاگربەستێکی دەستبەجێ و هەمیشەیی، گەیشتنی هاوکاریی مرۆیی، ئازادکردنی بارمتەکان و هەروەها رێگەیەک بەرەو چارەسەری دوو دەوڵەتی. ئەوانە خاڵە لەپێشینەکانی ئێمەن. هیچ شتێکی دیاریکراوم نییە لەسەر خاڵەکانی پلانەکە بڵێم.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ