رووداو دیجیتاڵ
بڕیارە هەفتەی داهاتوو سەرۆککۆماری تورکیا و سەرۆکی رووسیا لە سۆچی رووسیا کۆببنەوە.
ئاژانسی هەواڵیی فەرمیی رووسیا TASS بڵاویکردەوە، رۆژی 4ی ئەیلوولی 2023 رەجەب تەیب ئەردۆغان، سەرۆککۆماری تورکیا و ڤلادیمیر پووتین، سەرۆکی رووسیا لە سۆچی کۆدەبنەوە. هەرچەندە بڕیاربوو دیدارەکە لە کۆتاییەکانی مانگی تەممووز بکرایە، بەڵام دیدارەکەی رۆژی 7ی تەممووزی نێوان ئەردۆغان - زێلێنسکی لە ئیستەنبووڵ و رادەستکردنەوەی دیلەکانی ئۆکراینی کە چەند فەرماندەیەکی ئۆکراینی بوون، لایەنی رووسیی نیگەران کرد.
هەروەها پاڵپشتیکردنی تورکیا بۆ ئەندامێتیی ئۆکراینا لە ناتۆ، هێندەی دیکە رووسەکانی دڵگران کرد و ئەمەش هۆکار بوو بۆ ئەوەی کۆبوونەوە دوو قۆڵییەکەی ئەردۆغان - پووتین بۆ وادەیەکی نادیار دوابخرێت.
ئاژانسی TASS باس لەوە دەکات، یەکێک لە رۆژەڤەکانی سەردانەکەی هاکان فیدان، وەزیری دەرەوەی تورکیا بۆ مۆسکۆ و دیدارە دوو قۆڵییەکەی لەگەڵ سێرگی لاڤرۆڤی هاوشانە رووسیاییەکەی، ئامادەکاری بوو بۆ ئەنجامدانی دیدار و کۆبوونەوەی نێوان ئەردۆغان - پووتین. جەخت لەوەش دەکاتەوە، تورکیا مکوڕە بۆ ئەنجامدانی دیدارەکە.
باس لەوەش کرا، لە دیدارەکەی نێوانیاندا بڕیارە پەیوەندییەکانی مۆسکۆ - ئەنقەرە، میکانیزمی گواستنەوەی دانەوێڵەی رووسیا بۆ وڵاتانی ئەفریقا، کاراکردنەوەی رێککەوتنی ئیستەنبووڵ بۆ گواستنەوەی دانەوێڵەی ئۆکراینا، دوایین پێشهاتەکانی جەنگی رووسیا - ئۆکراینا و پەرەپێدانی زیاتری پەیوەندییە ئابوورییەکان دەخرێنە بەرباس و لێکۆڵینەوە.
تاوەکو ئێستا سەرۆکایەتیی فەرمانگەی پەیوەندییەکان لە سەرۆکایەتیی کۆماری تورکیا، راگەیێندراوی لەبارەی سەردانەکەی ئەردۆغان بڵاونەکردووەتەوە.
لەوەتەی جەنگی نێوان رووسیا و ئۆکراینا سەریهەڵداوە، رەجەب تەیب ئەردۆغان 13 جار پەیوەندیی تەلەفۆنیی لەگەڵ ڤلادیمیر پوتین، سەرۆکی رووسیا کردووە و چوار جار کۆبوونەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ