Hewlêr (Rûdaw) - Wezîrê Dadê yê Tirkiyeyê Yilmaz Tunç ragihand ku di navbera 2018-2023yan de, 2 hezar û 258 girtî di girtîgehan canê xwe ji dest daye.
Parlamenterê CHPyê yê Aydinê Suleyman Bulbul, têkildarî mirinên di girtîgehan de pirsnameyek pêşkêşî parlamentoyê kir.
Wezîr Tunç pirsnameya Bulbul a derbarê mirinên di girtîgehan de yên ji ber Covid-19ê wiha bersivand:
“Di arşîva wezareta me de, ji bo pirsa ku li parlementoyê hate kirin agahiyeke statîstîkî nîne.”
Bulbul di pirsnameya xwe ya din de wiha got:
“Li girtîgehan gelek mirinên bi guman hene. Sedema hinek ji van mirinan wekî xwekujî yan jî rewşa tenduristiyê hatine tomarkirin.
Pêwîst e ev were lêkolînkirin û derbarê kesên berpirsyar de tişta pêwîst were kirin.
Em dibînin ku bûyer nayên lêkolînkirin û berpirsên wê jî nayê eşkerekirin.”
Bulbul ji Wezîr Tunç pirsî, “Sedema kesên ku di navbera salên 2018-2023yan de mirine çi ye? Di van bûyeran de xemsariya karmendên girtîgehê heye an na, eger hebe hatine cezakirin?”
Wezîrê Dadê yê Tirkiyeyê Yilmaz Tunç wiha bersiv da:
“Di navbera salên 2018-2023yan de, ji ber sedemên xwezayî 2 hezar û 258 kesan canê xwe ji dest daye.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse