Hewlêr (Rûdaw) - Serokê Amerîkayê, Donald Trump ragihand ku Îran xwediyê enerjiyeke zêde ye û xelkê wî welatî dixwazin sûdê ji vê enerjiyê bibînin û tekez kir ku Waşington naxwaze hikûmeta Îranê biguherîne.
Serokê Amerîkayê Donald Trump li ofîsa xwe li Koşka Spî got: “Îran welatekî xwedan enerjiyeke zêde ye, çavê me ne li guhertina rejîmê ye. Enerjiyeke wan a zêde heye, hevdem bi baweriya min ew dixwazin sûdê ji vê enerjiyê bibînin.”
Donald Trump got, ew nikare bîne ber çavê xwe ku Îran bixwaze rêya dijwar hilbijêrê û sûd ji vê enerjiya xwe ya zêde nebîne, eger vê yekê jî bike wê demê dibînin ka çi diqewime.
Trump wiha axivî “Îran welatekî xwedan enerjiyeke zêde ye, çavê me ne li guhertina rejîmê ye. Hevdem bi baweriya min ew dixwazin sûdê ji vê enerjiyê bibînin. Bi rastî di vê baweriyê de me. Li gor min Koreya Bakur jî bi heman awayî xwedan enerjiyeke zêde ye, ew jî dixwazin sûdê ji wê enerjiya xwe bibînin. Loma ka em bizanin çi dibe. Enerjiyeke zêde ya Îranê heye û nikarim bînim ber çavê xwe ku ew dixwazin di rêyên dijwar re derbas bibin, eger wê bixwazin, wê demê dibînin ka çi diqewime."
Ev daxuyaniya Trump a di derbarê Îranê de, di demekê de ye, ku Waşingtonê hin cezayên nû bi ser Îranê de sepand.
Wezareta Xezîneya Amerîkayê ragihand, ku wan cezayên nû bi ser seketora petrol Îranê û veguhestina deryayî de sepandiye.
Li gor daxuyaniya wê wezaretê, ew dorpêç 16 dezgehan û 11 kesan û 10 keştiyên veguhastina petrolê li xwe digire.
Li gorî ragihandina wezareta Xezîneya Amerîka, rola wan kesan û dezgehan di kerta bazirganî û veguhestina petrola Îranê de heye, û çavkaniyên darayî ji Supaya Pasdaran a Îranê û Hizbulaha Lubnanî re dabîn dikin.
Herwiha Berpirsê Dosyeya Îranê di Wezareta Derve ya Amerîkayê de, Brian Hook jî ragihandiye, ku Supaya Pasdaran petrolê ji bo terorîstan dibe, û toreke ne yasayî bikar tîne, û di wê rêyê re bi milyonan dolaran qezenc dike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse