رووداو دیجیتاڵ
نوێنەرێکی مامۆستایانی وانەبێژی هەرێمی کوردستان دەڵێت، لە سنووری سلێمانی بەهۆی نەبوونی پارە لە بانکەکان تائێستا مامۆستایانی وانەبێژ مووچەی مانگی 12ـی ساڵی رابردوویان وەرنەگرتووە.
رۆژی چوارشەممە، 1-2-2023، کارۆخ عەبدوڵڵا کە یەکێکە لە نوێنەرانی مامۆستایانی وانەبێژ بە تۆڕی میدیایی رووداوی گوت، بڕیاربوو دوای تەواوبوونی لیستی مووچەی مانگی 12، وانەبێژان شایستە داراییەکانیان وەربگرن، بەڵام لە 24-1ـەوە دابەشکردنی مووچە کۆتایی هاتووە و تائێستا وانەبێژان لە سنووری پارێزگای سلێمانی و ئیدارەی گەرمیان و راپەڕین مووچەیان وەرنەگرتووە.
کارۆخ عەبدوڵڵا دەڵێت، پەیوەندی بە بانکی هەرێم لە سلێمانی کردووە و پێیانگوتوون پارە لە بانک نییە بۆ دابەشکردنی مووچەی مانگی 12ـی ساڵی رابردووی وانەبێژان.
تاوەکو ئێستا تەنیا لە سنووری پەروەردەی هەولێر و دهۆک وانەبێژان مووچەی مانگی 12یان وەرگرتووە.
مووچەی مامۆستایانی وانەبێژ بەگوێرەی بڕوانامە و ئەو شوێنەی وانەی تێدا دەڵێنەوە جیاوازە، بەگشتی کەمترینیان مانگانە 250 هەزار دینار و زۆرترینیشیان 400 هەزار دینار وەردەگرن.
لە هەرێمی کوردستان نزیکەی 33 هەزار وانەبێژ هەن؛ 11 هەزار لە پارێزگای هەولێر، 10 هەزار لە پارێزگاکانی سلێمانی و هەڵەبجە و 12 هەزاریش لە سنووری پارێزگای دهۆک.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ