رووداو دیجیتاڵ
گوتەبێژی وەزارەتی وزە و سامانە کانزاییەکانی ئوردن بە رووداوی راگەیاند، مانگانە 300 هەزار بەرمیل نەوتی خاو لە عێراقەوە بە 16 دۆلار کەمتر لە نرخی جیهانیی نەوتی برێنت هاوردە دەکەن. لەبارەی پێکەوەبەستنی کارەباش، گوتەبێژی وەزارەتی وزەی ئەو وڵاتە ئاشکرای کرد، سەرەتای ساڵی داهاتوو پڕۆژەی پێکەوەبەستنی هێڵی 200 مێگاواتی لەگەڵ عێراق تەواو دەبێت.
ئەمڕۆ چوارشەممە 3ی کانوونی یەکەمی 2025 لیندا عەبادی، گوتەبێژی وەزارەتی وزە و سامانە کانزاییەکانی ئوردن بە تۆڕی میدیایی رووداوی راگەیاند، "دابینکردنی نەوتی خاو لە عێراقەوە بۆ ئوردن بەردەوامە، بە سەرچاوەیەکی گرنگ دادەنرێت بۆ ئاسایشی وزەی وڵاتەکەمان و رێژەی 7%ی پێویستییەکانمان بۆ نەوتی خاو پێکدەهێنێت."
گوتەبێژی وەزارەتی وزەی ئوردن گوتی، "بەپێی ئەو یاداشتی لێکتێگەیشتنەی لەنێوان وەزارەتی نەوتی عێراق و وەزارەتی وزە و سامانە کانزاییەکان لە مانگی ئایاری 2023 واژۆ کراوە، رۆژانە بڕی 10 هەزار بەرمیل لە عێراقەوە هاوردە دەکەین، کە ئەو بڕە 15% بەگوێرەی بارودۆخ کەم و زیاد دەکات و تێکڕای مانگانە 300 هەزار بەرمیلە."
بە گوتەی لیندا عەبادی، بەگوێرەی یاداشتە لێکتێگەیشتنەکەیان لەگەڵ عێراق، "نرخەکە لەسەر بنەمای نرخی مانگانەی نەوتی خاوی برێنت دادەنرێت، بە کەمکردنەوەی 16 دۆلار بۆ هەر بەرمیلێک، ئەم داشکاندنەش بۆ پڕکردنەوەی جیاوازی جۆری و کرێی گواستنەوەیە، چونکە مانگانە نیوەی بارە نەوتەکە لەڕێگەی تانکەرە ئوردنییەکانەوە هاوردە دەکەین."
بەگوێرەی ئەو زانیارییانەی کە رووداو لە کۆمپانیای نەوتی باکووری سەر بە وەزارەتی نەوتی عێراق وەریگرتوون، مانگانە 320 بۆ 328 هەزار بەرمیل هەناردەی ئوردن دەکرێت و سەرجەمی ئەو بڕە نەوتەش لە کۆگەی نوێی نەوتی کەرکووکەوە لەڕێگەی تەنکەرەوە هەناردە دەکرێت.
گوتەبێژی وەزارەتی وزەی ئوردن دەڵێت، "پڕۆژەی گەورەترمان لە داهاتوو لەگەڵ عێراق هەیە، ئەویش پڕۆژەی بۆریی نەوتە، کە بەسرە بە عەقەبەوە دەبەستێتەوە؛ رێڕەوێکی نوێی هەناردەکردنە و پێگەی ئوردن وەک دەروازەیەکی لۆجستیی هەرێمی بەهێز دەکات."
عەقەبە، تاکە شاری کەنار دەریایە لە ئوردن و دەکەوێتە باکووری رۆژھەڵاتی دەریای سوور لە نێوان کیشوەرەکانی ئاسیا و ئەفریقا.
'هێڵی نوێی پێکەوەبەستنی کارەبا لە 2026 تەواو دەبێت'
سەبارەت بە کارەبا، گوتەبێژی وەزارەتی وزە و سامانە کانزاییەکانی ئوردن ئاماژەی بەوە کرد، "قۆناخی یەکەمی هێڵی پێکەوەبەستنی کارەبایی لە نێوان وێستگەی ریشە لە ئوردن و ناوچەی روتبە لە عێراق لە 30 ئاداری 2024 بە ڤۆڵتیەی 132 کەی ڤی و توانای 40 مێگاوات خرایە کار."
لیندا عەبادی ئاشکراشی دەکات، "کارکردن بەردەوامە بۆ تەواوکردنی کارەکانی پێکەوەبەستنی وێستگەی ریشە بە وێستگەی قائیم، کە درێژیی هێڵەکە 330 کیلۆمەترە و بە ڤۆڵتیەی 400 کەی ڤییە. توانای ئەم هێڵە دەگاتە 150 بۆ 200 مێگاوات، پێشبینی دەکرێت سەرەتای ساڵی 2026 هێڵەکە بکەوێتە کار."
هاوکات، ئەحمەد مووسا، گوتەبێژی وەزارەتی کارەبای عێراق بە رووداوی گوت، "پڕۆژەی بەستنەوەی کارەبا بە وڵاتانی کەنداو بەردەوامە و 95%ی کارەکانی گرێدراو بە کوێت تەواو بوون. لە ناوچەی فاوی بەسرەش 100%ی کارەکانمان تەواو کردوون. لە سەرەتای ساڵی داهاتوودا 500 مێگاوات کارەبا لە رێگەی وڵاتانی کەنداوەوە وەک قۆناخی یەکەم زیاد دەکرێت، دواتر لە قۆناخی دووەمدا دەبێتە 1000 مێگاوات و لە قۆناخی سێیەمیش دەگاتە 2000 مێگاوات."
گوتەبێژی وەزارەتی کارەبای عێراق دەڵێت، "جگە لە رێککەوتنەکانمان لەگەڵ ئوردن و تورکیا بۆ بەرهەمهێنانی وزەی کارەبا. بەم نزیکانەش رێککەوتنێکی ستراتیژیمان لەگەڵ سعودیە دەبێت و هەموو کارەکانی رێککەوتنەکە تەواو بوون و تەنیا کاتی راگەیاندنی دەستپێکی کار ماوە."
ئێستا عێراق زیاتر لە 28 هەزار و 100 مێگاوات کارەبا بەرهەمدەهێنێت، لە کاتێکدا بۆ دابینکردنی کارەبای 24 کاژێری، پێویستی بە 55,000 مێگاوات کارەبایە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ