رووداو دیجیتاڵ
بەڕێوەبەری گومرگی پارێزگای کرماشان رایگەیاند، لە حەوت مانگی رابردوودا هەناردەکردنی کاڵا لە رێگەی دەروازەی سنووریی خوسرەوییەوە لە رووی نرخەوە 45٪ زیادی کردووە و گەیشتووەتە زیاتر لە 567 ملیۆن دۆلار.
رۆژی سێشەممە، 4ی تشرینی دووەمی 2025، رەزا نیکرەوش، بەڕێوەبەری گشتیی گومرگی کرماشان رایگەیاند، لە 21-03-2025ـەوە تاوەکو 21-10-2025 واتە لە ماوەی حەوت مانگدا، یەک ملیۆن و 254 هەزار تۆن کەلوپەل هەناردەی عێراق کراوە.
بە گوتەی بەڕێوەبەری گشتیی گومرگی کرماشان، ئەو کەلوپەلانەی لە رێگەی دەروازە سنوورییەکەوە هەناردەکراون، بایی زیاتر لە 567 ملیۆن و 364 هەزار دۆلار بوون.
رەزا نیکرەوش رایگەیاند، بەراورد بە پار لە هەمان ماوەدا هەناردەکردنی کەلوپەل لە رێگەی دەروازەی سنووریی خوسرەوییەوە لەڕووی کێشەوە 51% و لەڕووی نرخیشەوە 45% زیادی کردووە.
زیاترین ئەو کەلوپەلانەی لە رێگەی ئەو دەروازە سنوورییەوە هەناردە کراون بریتین لە: ئاسن، پۆڵا، چیمەنتۆ، بەرهەمە پلاستیکییەکان، شیر و بەرهەمە شیرەمەنییەکان، سەوزە و میوە.
لە پارێزگای کرماشانی رۆژهەڵاتی کوردستان، پێنج دەروازەی سنووری هەن، کە سیانیان لەگەڵ هەرێمی کوردستانن و دوو دەروازەی دیکەش لەگەڵ ناوچەکانی لە ژێر کۆنترۆڵی حکومەتی عێراقن.
دەروازە سنوورییەکانی پەروێزخان، شووشمێ و شێخ سڵە دەکەونە سنووری هەرێمی کوردستان و دەروازەی سنوورییەکانی خوسرەوی و سومار دەکەونە سەر سنووری نێوان کرماشان و قەزای خانەقین لە پارێزگای دیالە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ