رووداو دیجیتاڵ
نرخی ئۆنسەیەک زێڕ 3 هەزار و 600 دۆلاری تێپەڕاند. جێگری سەرۆکی سەندیکای زێڕنگرانی هەولێر دەڵێت، بەرزترین نرخی مێژووە.
ئەمڕۆ دووشەممە، دوای کردنەوەی بازاڕەکانی ئاسیا، نرخی ئۆنسەیەک زێڕ 3 هەزار و 610 دۆلاری تێپەڕاند.
عەبدوڵڵا ئەکرەم، جێگری سەرۆکی سەندیکای زێڕنگرانی هەولێر ئەمڕۆ دووشەممە بە تۆڕی میدیایی رووداوی گوت: "نرخی ئۆنسە لە بەرزترینی مێژوویدایە. ئەمڕۆ مسقاڵێک زێڕی عەیار 21 لە هەرێمی کوردستان بە 723 هەزار دینار دەفرۆشرێ".
جێگری سەرۆکی سەندیکای زێڕنگرانی هەولێر دەڵێت: "ئەمڕۆ مسقاڵێک زێڕی عەیار 22 بە 757 هەزار دینارە و عەیار 18ش بە 620 هەزار دینارە".
ئەو نرخەی سەندیکای زێڕنگران دیاریکردووە بەبێ حەقدەستە. عەبدوڵڵا ئەکرەم دەڵێت: "نرخی حەقدەستی زێڕی عێراقی مسقاڵی 25 هەزار دینارە و کەمترینە؛ زێڕی ئیتاڵی زۆرترین حەقدەستی هەیە و بۆ مسقاڵێک دەگاتە نزیکەی 150 هەزار دینار، بەدوای ئەویشدا زێڕی تورکی و کەنداو هەن".
کایل رۆدا، شرۆڤەکاری بازاڕە داراییەکان سەر بە کۆمپانیای راوێژکاری (کاپیتاڵ دۆت کۆم) لەو بارەیەوە رایگەیاند: "هۆکاری بەرزبوونەوەی نرخی زێڕ ئامارەکانی بازاڕی کاری ئەمریکایە کە چاوەڕوانی دروستکردووە بانکی ناوەندی رێژەی سوودی بانکی 50 خاڵ دابەزێنێت."
رۆدا دەڵێت: "هەموو هۆکارەکان ئاماژە بە بەرزبوونەوەی زیاتری نرخی زێڕ دەکەن، بەتایبەتی ئەگەر هاتوو هەڵاوسان دابەزێ کە دەبێتەهۆکار بۆ ئەوەی نرخی یەک ئۆنسە زێڕ بتوانێ خۆی لە 3600 دۆلار بداتەوە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ