رووداو دیجیتاڵ
بەڕێوەبەری گشتیی گومرگی کرماشان و سەرپەرشتیاری گومرگەکانی ئەو پارێزگایە دەڵێت، لە مانگی یەکەمی بەهاری ئەمساڵدا بە بەهای نزیکەی 74 ملیۆن دۆلار کەلوپەل لە دەروازەی سنووریی خوسرەوییەوە هەناردەی عێراق کراوە.
عەلی ئەسغەر عەباسزادە، بەڕێوەبەری گشتیی گومرگی کرماشان و سەرپەرشتیاری گومرگەکانی ئەو پارێزگایە رایگەیاند، لە مانگی یەکەمی بەهاری ئەمساڵدا واتە لە 21-03-2024 تاوەکو 21-04-2024، لە دەروازەی سنووریی خوسرەوی بە گشتی 111 هەزار و 642 تۆن کەلوپەل بە بەهای 73 ملیۆن و 914 هەزار دۆلار هەناردە کراوە.
عەلی ئەسغەر عەباسزادە گوتی، ئەم بڕە لە هەناردەکردنە بەراورد بە پار لەڕووی کێشەوە 22٪ کەمیکردووە، بەڵام لەڕووی نرخەوە 47٪ زیادیکردووە.
سەرپەرشتیاری گومرگەکانی پارێزگای کرماشان دەڵێت، لەو بڕە 85 هەزار تۆن کەلوپەل بە بەهای 61 ملیۆن و 504 هەزار دۆلار هەناردەی راستەوخۆ لە دەروازەی سنووریی خوسرەوییەوە بووە کە بەراورد بە هەمان ماوەی پار، لەڕووی نرخەوە 98% زیادیکردووە.
دەشڵێت، لەو ماوەیەدا 26 هەزار و 448 تۆن کەلوپەلی گومرکەکانی دیکەی ئێران بە بەهای 12 ملیۆن و 410 هەزار دۆلار لە رێگەی دەروازەی سنووریی خوسرەوییەوە هەناردە کراوە، کە ئەوەش بەراورد بە ساڵی رابردوو لەڕووی نرخەوە 36٪ و لەڕووی کێشەوە 40٪ کەمیکردووە.
زۆربەی ئەو کەلوپەلانەی لە کرماشانەوە هەناردەی دەرەوە کراون بریتین لە ئاسن، چیمەنتۆ، کاشی، سیرامیک، بەردی بیناسازی، شووشە، شیشی ئاسن، پۆلا، هێلکە، کێک و بیسکویت، سەوزە و میوە.
پارێزگای کرماشان 371 کیلۆمەتر سنووری هاوبەشی لەگەڵ هەرێمی کوردستان و عێراقدا هەیە. پارێزگاکە پێنج دەروازەی سنووری هەیە کە سێیان لەگەڵ هەرێمی کوردستانن، دەروازەیەک دەکەوێتە سەر سنووری خانەقینی باشووری کوردستان و دەروازەیەکی سنووریش لەگەڵ ناوچەکانی دیکەی عێراقە.
دەروازە سنوورییەکانی پەروێزخان، شوشمێ و شێخ سڵە دەکەونە سنووری هەرێمی کوردستان، دەروازەی سومار دەکەوێتە سنووری قەزای خانەقین لە باشووری کوردستان و دەروازەی سنووری خوسرەویش دەکەوێتە سەر سنووری نێوان کرماشان و ناوچەکانی دیکەی عێراق.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ