بەشێک لە براوەکانی ئیندپێندت سپێرت، وێنە: AFP
رووداو دیجیتاڵ
38مین رێوڕەسمی دابەشکردنی خەڵاتەکانی ئیندپێندت سپێرت بەڕێوەچوو و فیلمی ' Everything Everywhere All at Once' کە چانسی زۆری لە وەرزی دابەشکردنی خەڵاتەکانی ئەمساڵدا هەبووە، توانی حەوت خەڵات بەدەستبێنێت، لەوانەش خەڵاتی باشترین فیلم.
هەریەک لە میشێل یۆهـ و کی هۆی کوان لەم بەرهەمە سینەماییەدا، توانیان خەڵاتی باشترین رۆڵگێڕانی سەرەکی و باشترین رۆڵگێڕانی لاوەکی بەدەست بێنن و ستیڤانی هسۆ ئەکتەری فیلمەکە، خەڵاتی باشترین رۆڵگێرانی سەرنجڕاکیشێ بەدەستهێنا.
هەردوو نووسەر و دەرهێنەری فیلمی 'Everything Everywhere All at Once' دانیال کوان و دانیال شاینێرت خەڵاتی باشترین سیناریۆ و باشترین دەرهێنەریان بەدەستهێنا و خەڵاتی باشترین مۆنتاژیش بۆ پۆڵ رۆجەرز بوو لەم بەرهەمەدا.
جگە لەم خەڵاتانە، چەند خەڵاتێکی دیکە دابەشکران و چالاکییەکە بەربەیانی ئەمڕۆ یەکشەممە 5ـی ئازاری 2023، لە کەنار دەریای سانتا مۆنیکای کالیفۆرنیا لە ئەمریکا بەڕێوەچوو.
رێوڕەسمی راستەوخۆی خەڵاتەکە لە هەژماری تایبەتی تۆڕە کۆمەڵایەتییەکانی رێکخەرانی خەڵاتەکە و هەژماری 'ئای ئێم دی بی' لە تویتەر پەخشکرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ