رووداو دیجیتاڵ
رێن مێگورۆ، گۆرانیبێژ و ئەکتەری ژاپۆنی، پەیوەندی بە ئەکتەرانی وەرزی دووەمی زنجیرە مێژووییە بەناوبانگەکەی (Shōgun)ـەوە کرد و رایگەیاند، رۆڵی کارەکتەری (کازوتادا) دەگێڕێت.
رێن مێگورۆ، ئەندامی گرووپی بەناوبانگی پۆپی (سنۆ مان)ـە، خۆشحاڵیی خۆی بەم بەشدارییە دەربڕی و گوتی: "دوای بینینی وەرزی یەکەمی زنجیرەکە لە دیزنی پڵەس، زۆر سەرسام بووم بە شێوازی ناوازەی پێشاندانی و هەستم بە گەرموگوڕییەکی زۆر کرد بۆ بەشداربوون تێیدا".
مێگورۆ ئاماژەی بەوەشکرد، دوای ناسینی تیمی بەرهەمهێنان و بینینی ئەکتەری سەرەکی، هیرۆیۆکی سانادا، بەشداریی لە تاقیکردنەوەکاندا کردووە و ئێستا خەونەکەی بووەتە راستی. ئەو جەختی لەوە کردەوە، پابەند دەبێت بە پاراستنی میراتی زنجیرەکە و رۆڵەکەی بەوپەڕی وردییەوە دەگێڕێت.
(Shōgun) لە رۆمانە بەناوبانگەکەی جەیمس کلاڤێڵ لە 1975 وەرگیراوە، باس لە گەیشتنی کەشتیوانێکی ئینگلیز بەناوی جۆن بلاکسۆرن دەکات. چیرۆکەکە تیشک دەخاتە سەر ململانێ سیاسییەکان، جیاوازییە کولتوورییەکان و هەوڵی لۆرد یۆشی تۆرانگا بۆ گەیشتن بە لووتکەی دەسەڵات و بوون بە شۆگن، واتە فەرمانڕەوای سەربازیی ژاپۆن.
وەرزی یەکەمی زنجیرەکە سەرکەوتنێکی گەورەی لە ئاستی جیهاندا بەدەستهێنا و بووە پڕبینەرترین زنجیرە لە پلاتفۆرمی دیزنی پڵەس و هولو. رەخنەگران ستایشی وردەکارییە مێژووییەکانی، نواندنی بەهێزی ئەکتەرەکان و بەرهەمهێنانەکەیان کردووە.
رووداوەکانی وەرزی دووەم، یەک دەیە دوای کۆتاییهاتنی وەرزی یەکەم دەستپێدەکەن و بڕیارە کاری وێنەگرتنی لە کانوونی دووەمی 2026 دەستپێبکات.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ