هەڵەیەک روویدا! دووبارە هەوڵبدە
رووداو - تەندروستی
پسپۆڕێکی نەخۆشی و نەشتەرگەرییەکانی چاو (پسپۆڕی ورد لە تۆڕەی چاو) رایدەگەیێنێت: زۆرجار نەخۆش بە لێڵبوونی بینایی یاخود ناڕێکیی بینین دێتە لامان و کە پشكنینی بۆ دەکەین، دەبینین شەکرەیەتی و پێی نەزانیوە.
د. زانا غەنی چەلەبی، پسپۆڕی نەخۆشی و نەشتەرگەرییەکانی چاو (پسپۆڕی ورد لە تۆڕەی چاو) بە رووداوی راگەیاند، ئاوی سپیی چاو نەشتەرگەری بۆ نەکرێت دەشێت ببێتە هۆی ئاوی رەش و بەرزبوونەوەی پەستانی چاوەکان.
د. زانا چەلەبی دەڵێت: نەخۆشیی شەکرە لێکەوتەی لەسەر چاو زۆرە و پێویستە بە باشی کۆنتڕۆڵ بکرێت، چونکە لوولەکانی خوێنی چاو زۆر لاواز دەکات و لێڵبوونی بینایی لێدروستدەبێت.
دەقی وەڵامەکانی د. زانا لەبارەی ئاوی سپیی چاو و نەخۆشیی شەکرە؛
رووداو: ئاوی سپیی چاو زیاتر لە چ تەمەنێکدا مرۆڤ تووشی دەبێت؟ ئایا گەنجان (خوار 50 ساڵ) تووشی دەبن؟
د. زانا چەلەبی: ئاوی سپیی چاو زۆر هۆکاری هەیە و یەکێکیان ئەوەیە کە لەدوای 50 ساڵی تووشی دەبی، تەنانەت لە منداڵ دوای لەدایکبوونیش هەندێک نەخۆشی هەن کە لەماوەی دووگیانیدا دایکەکە تووشی دەبێت و هۆکار دەبێت بۆ ئەوە. نەوجەوانانیش دەشێت تووشی ببن کە هۆکارەکەی نەخۆشییە بەتایبەتیش شەکرە.
رووداو: حاڵەت هەبووە کە بەهۆی شەکرەوە تووشی ئاوی سپی چاو بووبێت و پێی نەزانیبێت شەکرەیەتی، بەڵکو بۆ ئاوی سپیی چاو هاتبێتە لاتان؟
د. زانا چەلەبی: زۆرجار نەخۆش بە لێڵبوونی بینایی یاخود ناڕێکیی بینین دێتە لامان و کە پشكنینی بۆ دەکەین دەبینین، شەکرەیەتی و دەینێرینە لای پزیشکی پسپۆڕ تاوەکو شەکرەکەی کۆنتڕۆڵ بێت، چونکە بەهۆیەوە تووشی هەوکردنی چاو و تێکچوونی لوولەکانی نێو چاوی دەبێت.
رووداو: ئاوی سپیی چاو نەشتەرگەری بۆ نەکرێت، دەبێتە هۆی چی؟
د. زانا چەلەبی: ئاوی سپیی چاو پشتگوێبخرێت دەشێت ببێتە هۆی؛
- تەسکبوونەوە ژووری پێشەوەی چاو کە دەبێتە هۆی بەرزبوونەوەی پەستانی چاوەکان و ئاوی رەش.
- هەوکردنی چاو بەهۆی نەخۆشیی خۆییەبەرگری.
- لێڵبوونی بینایی.
- قورسبوونی ئاوە سپییەکەی و بڵاوبوونەوەی بەنێو چاودا، کە پێویستی بە نەشتەرگەری زۆر گەورە دەبێت.
- دڕان و لێکترازانی تۆڕەی چاو.
رووداو: شەکرە کۆنتڕۆڵ نەکرێت، چی لە تۆڕی چاو دەکات؟
د. زانا چەلەبی: نەخۆشیی شەکرە لێکەوتەی لەسەر چاو زۆرە و پێویستە بە باشی کۆنتڕۆڵ بکرێت، چونکە لوولەکانی خوێنی چاو زۆر لاواز دەکات و لێڵبوونی بینایی لێدروستدەبێت، بۆیە باشترە تووشبووانی شەکرە هەمیشە پشکنینی چاو بکەن، بۆ ئەوەی هەر نەخۆشییەک هەبوو، زوو چارەسەر بکرێت لەلای پزیشکی پسپۆڕی چاو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ