مستەفا هیجری بۆ رووداو: نەبووینەتە بەشێک لە شەڕی ئەمریکا و ئێران 'ترەمپ چەکی پێنەداوین'

 

لە هەڤپەیڤینەکەدا لەگەڵ تۆڕی میدیایی رووداو، مستەفا هیجری لەبارەی بەشدارینەکردنیان لە جەنگی نێوان ئەمریکا، ئیسرائیل لەگەڵ ئێران گوتی: "خەباتی ئێمە دژی رژێمی کۆماری ئیسلامی زۆر پێش ئەم شەڕانە دەستیپێکردووە. هەرچەندە ئەم شەڕە ئێرانی لاواز کردووە، بەڵام ئێمە بەرنامە و ویستی خۆمان هەیە کە رەنگە لەگەڵ ئەجێندای وڵاتانی دیکە جیاواز بێت، بۆیە بە بڕیاری خۆمان نەبووینەتە بەشێک لەو شەڕە."

 

سەبارەت بە لێدوانەکانی دۆناڵد ترەمپ، سەرۆکی ئەمریکا کە باسی لە پڕچەککردنی کورد کردبوو، مستەفا هیجری رایگەیاند: "وەک حیزبی دیموکراتی کوردستانی ئێران و وەک ناوەندی هاوپەیمانیی هێزە کوردستانییەکانیش، هیچ چەکێکمان لە ئەمریکا وەرنەگرتووە. نازانین ئەو چەکانە بە کێ دراون، بەڵام لای ئێمە نین."

 

هەروەها ئاماژەی بەوە کرد، حکومەتی هەرێمی کوردستان هیچ جۆرە گوشارێکی لێ نەکردوون و، بڕیاری بەشدارینەکردنیان لە جەنگەکە بە تەواوی سەربەخۆیانە بووە.

 

 

 

مستەفا هیجری: ئێمە هەم وەکو حیزبی دیموکراتی کوردستانی ئێران و وەکو هێزەکانی دیکەی ئۆپۆزسیۆنی کوردیش کە ئێستا ئێمە هاوپەیمانییەکمان لەگەڵیاندا پێکهێناوە، خەباتی ئێمە دژی رژێمی کۆماری ئیسلامی لەپێناو خواست و داواکانی خەڵکەکەمان زۆر پێشی ئەو شەڕانە دەستیپێکردووە، لەمەودواش تاوەکو دەگەین بە ئاواتەکانمان بەپێی توانا بەردەوام دەبین. بۆیەشە ئێمە بەشێک نەبووین لەو شەڕە؛ راستە ئەو شەڕە کۆماری ئیسلامیی ئێرانی لاواز کردووە، بەڵام ئێمە خۆمان بەرنامە و ویستی خۆمان هەیە و رەنگە لەگەڵ بەرنامەی ئەمریکا و ئیسرائیل و شوێنانی دیکە جیاواز بێت. بۆیە ئێمە وەکو حیزبی دیموکراتی کوردستانی ئێران، دەتوانم بڵێم وەکو هێزەکانی هاوپەیمانیش کە بەیەکەوە کاردەکەین، ئەوە بڕیاری خۆمان بووە. 

 

 

مستەفا هیجری: ئێمە لەگەڵ هەرێمی کوردستان لە پەیوەندیداین، بەڵام نەچووینەتە سەر ئەو پرسانە. لە راستی دا ئێمە خۆمان بڕیاری خۆمان دەدەین کە چۆن خەبات بکەین و چی بکەین.

 

 

مستەفا هیجری: وەکو حیزبی دیموکراتی کوردستانی ئێران هیچ چەکێکمان وەرنەگرتووە. دەتوانم بەناوی ناوەندی هاوپەیمانیشەوە بڵێم کە حیزبەکانی بەشدار لەو هاوپەیمانییەش ئەو چەکانەیان وەرنەگرتووە. ئایا چەکەکان بەکێی دیکە دراون؟ نازانم!

 

 

مستەفا هیجری: کۆماری ئیسلامیی ئێران لە 45 ساڵی رابردوودا و لەو رۆژەوەی هاتووەتە سەر کار چەسپاندوویەتی کە ئەو ئاشتی لەگەڵ هیچ لایەنێکدا نییە. کۆماری ئیسلامیی ئێران بەدوای جێبەجێکردنی ئایدیۆلۆژییەکانییەتی. ئەو ئایدیۆلۆژیایە لەگەڵ سیاسەت و بەرنامەکانی ئەمریکا، ئیسرائیل و هەموو جیهان جیاوازی هەیە. ئەو تەنانەت لەگەڵ خەڵکی خۆشیدا لە ئاشتیدا نییە، بۆیە من هیچ هیوام نییە ئەو دانوستاندنانە ئەگەر سەریش بگرن و ببنە هۆی ئاشتییەک کە سەقامگیری بۆ رۆژهەڵاتی نێوەڕاست بهێنێت و کۆماری ئیسلامیی ئێران بگاتە ئەو بڕوایەی کە ئەو سیاسەتانەی کە لە رابردوودا هەیبوون و ئێستا شکستی لەسەر هێناون ئاڵوگۆڕی بەسەردا بێت. کۆماری ئیسلامی تاوەکو ئەو رۆژەی هەیە هەرچەند لاوازیش بێت، دەست لە بەرنامەکانی خۆی هەڵناگرێت کە نەک هەر ئاشتی لەگەڵ جیهان و خەڵکی خۆی نییە بەڵکو دروست بە پێچەوانەوە دووژمنایەتی و بەربەرەکانی لەگەڵ هەموو بیر و سیاسییەکانی دیکە لەگەڵیاندا ناتەبا و جیاوازە. 

 

 

مستەفا هیجری: نەخێر، هیچ هەوڵێک لەو بارەیەوە بۆ دانوستاندن لەگەڵ ئێمە نەدراوە. 

 

 

مستەفا هیجری: ئەوەندەی ئاگاداربم، نەخێر. 

 

 

مستەفا هیجری: بێگومان! ئەوان زۆر لەژێر مەترسیی هێرش دان. کەمپەکانی ئێمە و هێزەکانی ئۆپۆزسیۆنی کوردی ئێران کە خێزانەکانمان لەوێدا نیشتەجێبن، هەمووی بۆمباران کراوە. کەمپەکانی حیزبی دیموکراتی کوردستانی ئێران زیاتر لە هەمووان بۆمباران کراوە. دوای ئەو دانوستاندنانە کە دەستیانپێکردووە تەنانەت دوێنێ شەو هێرشیانکردە سەر کەمپەکانی ئێمە. رژێمی کۆماری ئیسلامیی ئێران دەستی لە بۆمبارانی کەمپەکانی ئێمە و تەنانەت هەرێمی کوردستانی عێراق هەڵنەگرتووە دوای ئەوەی کە بۆمبارانەکانی لەسەر وڵاتانی ناوچەکە هەڵگرت، بەڵام هەم هەرێمی کوردستان چەند جارێک بۆمباران کراوە، هەم بۆمبارانی کەمپەکان بەردەوامە. 

 

 

مستەفا هیجری: ئەوانەی من کۆبوونەوەم لەگەڵدا کردوون، پارتەکانی سۆشیالست و سۆشیال دیموکراتەکان بوون. ئەوان لە سەرەتاشەوە، باوەڕیان بە مافی نەتەوەکان، دیموکراسی و ئازادی لە ئێران هەبووە، بەڵام راستییەکەی ئەوەیە کە ئەو پارتانە و پارتەکانی ئەورووپا بە گشتی گفتوگۆیان لەگەڵ کۆماری ئیسلامی کردووە و پێیانخۆشە کە خەڵکی ئێران بە ئازادی بگەن. لە پەیوەندی لەگەڵ ئەو پرسەدا و وەکو هەنگاوی کرداری، شتێکی وامان پێوە نەبینیون. مەگەر لەمەودوا ئەوان ئاڵوگۆڕێک لە سیاسەتی خۆیاندا بکەن بۆ ئەوەی کاریگەرییان هەبێت لەسەر بەهێزکردنی ئۆپۆزسیۆنی ئازادیخواز و دیموکراسیخوازی ئێران.