گوتەبێژێکی وەزارەتی دەرەوەی ئەمریکا بۆ رووداو: ئامادەین لە کێشەی نەوتی نێوان بەغدا و هەولێر یارمەتیدەر بین

 

رۆژی 21ی ئەیلوولی 2022 لە نیویۆرک، ساموێل وێربێرگ، گوتەبێژی وەزارەتی دەرەوەی ئەمریکا بۆ کاروباری رۆژهەڵاتی نێوەڕاست لە وەڵامی پرسیارێکی رووداودا سەبارەت بە گۆڕانی کەشوهەوا دەڵێت، هاوئاهەنگییان لەگەڵ وڵاتانی رۆژهەڵاتی نێوەڕاست و باکووری ئەفریقیا هەیە "لەنێویاندا عێراق"، هەروەها رایگەیاند، ئەمریکا 300 ملیار دۆلاری بۆ بەرەنگاربوونەوەی گۆڕانی کەشوهەوا تەرخان کردووە. 

 

هەروەها گوتەبێژی وەزارەتی دەرەوەی ئەمریکا لە رۆژهەڵاتی نێوەڕاست، کە نووسینگەکەی لە شاری دووبەیە بە رووداوی راگەیاند، ئاگادار نییە کە پلانێک هەبێت بۆ یەکتربینینی سەرۆکی ئەمریکا و سەرۆکوەزیرانی عێراق لە شاری نیویۆرک. 

 

گوتەبێژی وەزارەتی دەرەوەی ئەمریکا بۆ کاروباری رۆژهەڵاتی نێوەڕاست لە هەڤپەیڤینەکەیدا لەگەڵ رووداو سەبارەت بە کێشەی نەوت لەنێوان عێراق و هەرێمی کوردستاندا رایگەیاند، "ئەمریکا ئامادەیە یارمەتیی پێشکێش بکات یان رۆڵێکی گونجاو بگێڕێت". هەروەها گوتی، "پێویستە هەموو عێراقییەکان سوود لە وزە ببینن، چ لەڕووی بەکاربردنی وزە لەنێو وڵات، یان لە فرۆشتنی".

 

لە نێوەڕاستی شوباتی ئەمساڵ دادگەی باڵای فیدراڵیی عێراق هەناردەکردنی نەوت و گازی هەرێمی کوردستانی بە "نادەستووری" ناوبرد، دواتر وەزارەتی نەوتی عێراق داوای لە کۆمپانیا نەوتییەکان کرد کارەکانیان لەگەڵ هەرێمی کوردستان رابگرن و ئەگەر بەردەوام بن دەخرێنە "لیستی رەشەوە" و مامەڵەیان لەگەڵدا قەدەخە دەکات، بەو هۆیەشەوە چەند کۆمپانیایەکی نەوت لە هەرێمی کوردستان کشانەوە.

 

 

 

ساموێل وێربێرگ: سەرەتا زۆر سوپاس بۆ بانگهێشتکردنم، سوپاسی کەناڵی رووداو دەکەم. سەبارەت بە گۆڕانی کەشوهەوا ئەوە بابەتێكە لە کارە لەپێشینییەکانی ویلایەتە یەکگرتووەکانی ئەمریکایە، کە لێرە لە کۆمەڵەی گشتیی نەتەوە یەکگرتووەکان کاری لەسەر دەکات، هەروەها هاوئاهەنگیشمان لەگەڵ وڵاتە جیاجیاکانی ناوچەکەدا هەیە لەنێویاندا عێراق و وڵاتانی دیکەی ناوچەی رۆژهەڵاتی نێوەڕاست و باکووری ئەفریقیا. لێرە لە نەتەوە یەکگرتووەکان هەوڵ و دەستپێشخەرییە نوێیەکانمان بیست و بینی و، لە گوتارەکەی سەرۆک بایدن بینیمان کە سەرنجی ئەمریکا لەسەر گۆڕانی کەشوهەوایە. ئێمە دەزانین کە کاریگەرییەکانی گۆڕانی کەشوهەوا سنوور بەزێنن و بە یەک وڵات نەبەستراونەتەوە، بەڵکو هەموو وڵاتانی جیهان دەگرێتەوە؛ بۆیە وەک لە گوتارەکەی سەرۆک بایدن بیستمان ئەو واژۆی لەسەر یاسایەکی نوێی ئەمریکا کردووە بۆ وەبەرهێنان بە بڕی 300 ملیار دۆلار بۆ رووبەڕووبوونەوەی گۆڕانی کەشوهەوا.

 

 

ساموێل وێربێرگ: ویلایەتە یەکگرتووەکان وای دەبینێت کە هەموو لایەنەکانی نێو عێراق پێویستە لەسەر سەرچاوەکانی وزە و چۆنێتیی سوود بینینی گەلی عێراق لە داهاتەکەی، لە کەشێکی گونجاو و بە یاسای گونجاو رێکبکەون. ئەمە گرنگترین شتە. پێویستە هەموو عێراقییەکان سوود لە وزە ببینن، چ لەڕووی بەکاربردنی وزە لەنێو وڵات، یان لە فرۆشتنی، پێویستە هەموو عێراقییەکان قازانجی لێ ببینن. بۆیە ئەمریکا لە پەیوەندیدایە لەگەڵ هەموو لایەنەکان. ئەگەر هەر داواکارییەک لەلایەن لایەنە عێراقییەکانەوە لێمان بکرێت، بۆ نموونە بۆ پێشکێشکردنی یارمەتیی تەکنیکی، ئێمە ئەزموونی دوور و درێژمان لەم بابەتانەدا هەیە و توانامان هەیە. ئێمە پەیوەندیمان لەگەڵ حکومەتی ناوەندی و حکومەتی هەرێمی کوردستاندا هەیە. لەگەڵ هەموو لایەنەکاندا لە پەیوەندیداین.

 

 

ساموێل وێربێرگ: لە کۆتاییدا، پێویستە چارەسەرەکە لەلایەن لایەنە عێراقییەکان خۆیانەوە بێت، ناکرێت نە ئەمریکا و نە هیچ لایەنێکی دیکەی بیانی خواستەکانی خۆی یان هەر چارەسەرێک بەسەر لایەنە عێراقییەکاندا بسەپێنێت. بۆیە ئەمریکا ئامادەیە یارمەتی پێشکێش بکات یان رۆڵێکی گونجاو بگێڕێت، بەڵام لە کۆتاییدا، چارەسەرەکە هەڵقوڵاوی نێوخۆی عێراق بێت. لە ساڵانی رابردوودا بینیمان کە لایەنەکان توانایان هەیە رێکبکەون و گفتوگۆ لەسەر هەندێ بابەت و پرس بکەن. واتە ئێمە بڕوامان بە توانای عێراق هەیە بۆ گەییشتن بە چارەسەر بۆ ئەم ململانێ و ناکۆکییانەی کە لەسەر وزە هەن. 

 

 

ساموێل وێربێرگ: سەبارەت بە هەڵمەتی بەرەنگاربوونەوە و بەزاندنی داعش، ئێمە لە هاوپەیمانیی نێودەوڵەتیی دژی داعش بەردەوامین لە کارکردن. پێش ئەم هەفتەیە و بەر لەوەی بێینە کۆمەڵەی گشتیی نەتەوە یەکگرتووەکان، ژمارەیەک کۆبوونەوەمان هەبوو. ماوەی چەندین مانگ بوو لەگەڵ هاوپەیمانەکانمان لە ناوخۆ و دەرەوەی ناوچەکە لە گفتوگۆدا بووین لەبارەی رووبەڕووبوونەوەی داعش. وێڕای هەموو ئەو بەرەوپێشچوونانەی لە ساڵانی دواییدا لە دژی داعش بەدەستمان هێناون، پێویستە لەگەڵ هەموو هاوبەش و هاوپەیمانمان بەردەوامبین لەم هەڵمەتەی دژی داعش، لەوانەش لەگەڵ پێشمەرگە، هێزە ئەمنییەکانی عێراق و هەموو هێزە ئەمنییەکانی ناوچەکە. چونکە ئەمریکا بڕوای وایە، وێڕای ئەم هەموو بەرەوپێشچوونانە، ئەم گرووپە تیرۆریستییەی داعش هێشتاش بۆ هەموومان ئاڵنگارییە.

 

 

ساموێل وێربێرگ: ئەو وردەکارییانەی کە لای من هەن... هیچ وردەکارییەک یان یان پێشبینییەکم لا نییە کە کۆبوونەوەیەک لەنێوان سەرۆک بایدن و سەرۆکوەزیران کازمی دا بکرێت، بەڵام دوو هەفتە لەمەوبەر سەرۆک بایدن قسەی لەگەڵ کازمیدا کرد، دوای ئەو هەموو تووندوتیژییەی کە لە شەقامەکانی بەغدا بینیمان. ئێمە لەو پەیوەندییە بەردەوام دەبین. سەرۆک بایدن کاتەکەی لێرە لە نیویۆرک سنووردارە، بەڵام ئەوەی کە گرنگە ئێمە پەیوەندیی رۆژانەمان هەیە، چ لە رێگەی باڵیۆزخانەکەمانەوە لە بەغدا یان لە رێگەی باڵیۆزخانەی عێراق لێرە لە واشنتن. واتە ئێمە لە هەموو ئاستەکاندا پەیوەندیی بەردەوام لە نێوان هەردوو حکومەتدا هەیە.

 

 

ساموێل وێربێرگ: سوپاس بۆ ئێوەش.