رووداو دیجیتاڵ
جێگری پارێزگاری لوڕستان دەڵێت، ناڕەزاییەکانی شاری کۆیەشت گرژییان لێکەوتەوە و لە ئەنجامدا ئەندامێکی هێزەکانی بەسیج کوژرا و 13 کەس لە هێزە ئەمنییەکانیش بریندار بوون.
رۆژی پێنجشەممە، 01-01-2026، سەعید پوورعەلی، جێگری پارێزگاری لوڕستان بۆ کاروباری سیاسی، ئەمنی و کۆمەڵایەتی رایگەیاند، شەوی رابردوو دژی گرانییەکان و سەختیی دۆخی بژێویی ژیان، ناڕەزایەتی و گردبوونەوە لە بەشێک لە شارەکانی پارێزگاکە بەڕێوەچوو.
بە گوتەی جێگری پارێزگاری لوڕستان، دروستبوونی گرژی لە خۆپێشاندان و ناڕەزاییەکانی شاری کۆیەشت، کوژراو و برینداری لێکەوتەوە.
سەعید پوورعەلی گوتی: "شەوی چوارشەممە لە شاری کۆیەشت خۆپێشاندانی ناڕەزایی بەڕێوەچوو و بەداخەوە ئەم ناڕەزایەتییانە لە لایەن ژمارەیەک لە ئاژاوەگێڕانەوە بە ئاراستەیەکی دیکە بەلاڕێدا برا" و لە ئەنجامدا ئەندامێکی بەسیج کوژرا.
پوورعەلی گوتیشی، بەهۆی دروستبوونی گرژی لە ناڕەزایەتییەکاندا 13 ئەندامی هێزە ئەمنییەکانیش، لە نێویاندا هێزەکانی پۆلیس و بەسیج، بریندار بوون.
جێگری پارێزگاری لوڕستان هۆشداری دەدات و دەڵێت: "پاراستنی ئاسایش و ئارامی لە پارێزگاکەدا هێڵی سووری ئێمەیە و بە تووندی لە بەرامبەر ئەو کەسانە دەوەستینەوە کە ئاسایش و ئارامی پارێزگاکە دەخەنە مەترسییەوە."
بە گوێرەی یەکێک لە گرتە ڤیدیۆکانی تایبەت بە خۆپێشاندان و گرژییەکە، ئەندامێکی هێزە ئەمنییەکان تەقەی راستەوخۆ لە خۆپێشاندەران دەکات و بەهۆیەوە باس لەوە دەکرێ کە ژمارەیەک هاونیشتمانی برینداربوون.
وەک لە دیمەنەکاندا دیارە دوو هاونیشتمانی بە گولـلە دەپێکرێن، بەڵام هیچ زانیارییەک لەبارەی تەندروستییان بەردەست نییە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ