رووداو دیجیتاڵ
لە چەند شارێکی پارێزگای کرماشان و پارێزگاکانی ئێران مامۆستایانی ناڕازی دژی جێبەجێنەکردنی داواکارییەکان گردبوونەوە و ئەنجوومەنی پیشەیی مامۆستایانی ئێران دەڵێت، لە تاران هێرشکراوەتەسەر مامۆستایان و ژمارەیەکیان دەستبەسەرکراون.
ئەمڕۆ پێنجشەممە گردبوونەوەی ناڕەزایی مامۆستایان لە کرماشان و شارەکانی هەرسین و ئیسلامئاوای ئەو پارێزگایە بەڕێوەچوو.
لە کرماشان، مامۆستایانی ناڕازی لە بەردەم بەڕێوەبەرایەتیی پەروەردەی پارێزگاکە گردبوونەوە.
ئەنجوومەنی پیشەیی مامۆستایانی ئێران دەڵێت، لە تاران هێزە ئەمنییەکان و پۆلیس دژی گردبوونەوەی مامۆستایان وەستاونەتەوە و بە تووندوتیژی بڵاوەیان پێکردوون و ژمارەیەک مامۆستاش دەستبەسەرکراون. لە شیراز و مەمەسەنی پارێزگای فارسیش مامۆستایانی ناڕازی گردبوونەوە.
ئەنجوومەنی پیشەیی مامۆستایانی ئێران لە بەیاننامەیەکدا داوایکردبوو، مامۆستایان ئەمڕۆ پێنجشەممە لە بەردەم وەزارەتی پەروەردە لە تاران و بەڕێوەبەرایەتی و فەرمانگەکانی پەروەردە لە شارەکان کۆببنەوە بۆ پێشاندانی ناڕەزایی لە جێبەجێنەکردنی خواستە پیشەیی، پەروەردەیی و یاساییەکانیان.
ئەو ئەنجوومەنە دەڵێت، مووچەی مامۆستایان کەم و نادادپەروەرانەیە، هەموو مامۆستایان لە مافی بیمەی گشتگیر سوودمەند نین و یاسای هاوتاکردنی مووچەی خانەنشین و فەرمانبەران بە تەواوی جێبەجێ نەکراوە.
هەروەها داوای پێداچوونەوە بە سیستمی پەروەردەی ئێران دەکات بۆ هێنانەدی دادپەروەری پەروەردەیی، جێگیرکردنی خوێندن بە زمانی دایک و دابینکردنی بودجەی پێویست بۆ قوتابخانەکان.
ئەو ئەنجوومەنە هەروەها داوا دەکات، سزای هەموو ئەو مامۆستایانە هەڵبوەشێندرێتەوە، کە بەهۆی خواستە پیشەییەکانیان دەستبەسەر و سزا دراون.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ