رووداو دیجیتاڵ
بەڕێوەبەری گشتیی بەڕێوەبەرایەتیی ئاژەڵداریی ورمێ دەڵێت، "نەخۆشیی تەبەق گەیشتووەتە پارێزگای ورمێ، بۆیە پێویستە هەرچی زووە ئاژەڵەکانیان بکوتن."
ئومێد خەلیلزادە، ئەمڕۆ دووشەممە، 1ـی کانوونی یەکەم گوتی، نەخۆشیی تەبەق گەیشتووەتە پارێزگای ورمێ. بەهۆی هاوسنووری ورمێ لەگەڵ سێ وڵات و گشتگیربوونی ئەم نەخۆشییە لە هەندێک وڵاتی دراوسێ، بە ئاژەڵدارانی گوت، "بۆ ئەوەی ئاژەڵەکانتان لەنێونەچن پێویستە بەزووترین کات بیانکوتن."
بەڕێوەبەری گشتیی بەڕێوەبەرایەتیی ئاژەڵداریی پارێزگای ورمێ گوتی، لە پارێزگاکەدا 4 ملیۆن مەڕ و بزن هەن کە مەترسیی نەخۆشی تەبەقیان لەسەرە و دەبێت بکوترێن تاوەکو لەنێونەچن.
خەلیلزادە گوتی، پارێزگای ورمێ پلەی سێیەمی لە ژمارەی ئاژەڵی بچووکدا هەیە و نزیکەی 30٪ـیان کوتراون.
بەڕێوەبەری گشتیی بەڕێوەبەرایەتیی ئاژەڵداریی پارێزگای ورمێ باشترین کاتی بۆ کوتانی ئاژەڵی بچووک، مانگی 3 تاوەکو مانگی 5 دیاریکرد و گوتی، کوتان لەو ماوەدا زۆرترین کاریگەریی دەبێت.
تەبەق نەخۆشییەکی ڤایرۆسییە، تووشی ئاژەڵە سمدارە دوولەتەکان دەبێت و ژێر سمی ئاژەڵەکە بریندار دەکات. بەپێی لێکۆڵینەوەکان، نەخۆشیی تەبەق خێراترین نەخۆشیی ڤایرۆسییە بۆ بڵاوبوونەوە لەنێو ئاژەڵاندا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ