رووداو دیجیتاڵ
بەڕێوەبەرایەتیی گواستنەوەی هەولێر دەستیکردووە بە جێبەجێکردنی سیستمی "مەنەفێست" بۆ تۆمارکردنی ناوی سەرنشینانی هێڵەکانی دەرەوەی شار. بەڕێوەبەری گواستنەوەش دەڵێت، پرۆسەکە ئەلیکترۆنییە و بۆ سەلامەتیی سەرنشینانە.
لە تێرمیناڵی گواستنەوەی هەولێر - بەغدا (گەراجی بەغدا)، کە هێڵەکانی گواستنەوەی سلێمانی، کەرکووک و شارەکانی ناوەڕاست و باشووری عێراق لەخۆدەگرێت، دەست بە تۆمارکردنی زانیاریی سەرنشینان کراوە. بەشێک لە شۆفێران نیگەرانییان لە دروستبوونی قەرەباڵخی دەربڕیوە و دەڵێن، کارمەندانی کۆمپانیایەک ناوی یەک بە یەکی سەرنشینان و شۆفێرەکان دەنووسن، ئەمەش کاتی زۆری پێویستە.
"پرۆسەکە رووپێوی نییە"
ئەندازیار عەبدولخالق عەلی، بەڕێوەبەری گواستنەوەی پارێزگای هەولێر، لە بەرنامەی مژاری رادیۆی رووداودا رەتیکردەوە پرۆسەکە "رووپێوی" بێت و رایگەیاند: "ئەوە گرێبەستێکی وەزارەتی گواستنەوەیە لەگەڵ کۆمپانیایەک بۆ دروستکردنی 'مەنەفێست' بۆ ئۆتۆمبێلەکانی گواستنەوە، کە ئامانج لێی تۆمارکردنی جووڵەی هاتووچۆی هێڵەکانی دەرەوەی شارە لەپێناو سەلامەتی و ئاسایشی سەرنشینان."
بە گوتەی بەڕێوەبەری گواستنەوەی هەولێر، سیستەمەکە لە هەموو پارێزگاکانی هەرێمی کوردستان جێبەجێ دەکرێت و هەر ئۆتۆمبێلێکی هێڵەکانی دەرەوەی شار لەکاتی دەرچوونی دا زانیارییە تەواوەکانی وەک (کات و رۆژی دەرچوون، ناوی شۆفێر و ناوی سەرنشینەکان)ـی بۆ تۆمار دەکرێت.
سیستمەکە چۆن کار دەکات؟
سەبارەت بە گلەیی شۆفێران لە دروستبوونی قەرەباڵخی، بەتایبەت لەو پاسانەی ژمارەی سەرنشینەکانیان زۆرە، عەبدولخالق عەلی گوتی: "سیستەمەکە ئەلیکترۆنییە؛ تەنیا بە سکانکردنی کارتی نیشتمانی یان ناسنامە، ناوی کەسەکە دێتە سەر سیستمەکە و پێویست بە نووسین بە دەست ناکات."
بەڕێوەبەری گواستنەوەی هەولێر دڵنیایی دەدات کە "تەنیا ناوی سەرنشین تۆمار دەکرێت و هیچ زانیارییەکی دیکەی کەسیی تۆمار ناکرێت."
لەبارەی گرفتی قەرەباڵخیشەوە ئاماژەی بەوە کرد، لەبەر ئەوەی پرۆسەکە لە سەرەتایە و لە قۆناخی ئەزموونیدایە، رەنگە هەندێک گلەیی هەبێت، بەڵام "لەگەڵ کۆمپانیای جێبەجێکار لەسەر هێڵ دەبین بۆ ئەوەی ئاسانکاریی تەواو بۆ شۆفێران و سەرنشینان بکرێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ