رووداو دیجیتاڵ
لە گوندی ماونانی سەر بە ناحیەی قەسرێ پیاوێک لەکاتی چوونی بۆ چیاکان بەمەبەستی هێنانەوەی بەروبوومی بەهاری جەڵتەی دڵ لێیداوە و گیانی لەدەستداوە.
شاخەوان حوسێن وەرتی، بەڕێوەبەری ناحیەی قەسرێ بە رووداوی راگەیاند، ئەو پیاوە ناوی ئەحمەد عەبدوڵڵایە و تەمەنی 40 ساڵە، بەڵام ئێستا دانیشتووی گەڕەکی شاوێسی هەولێرە و بە جەڵتەی دڵ کۆچی دواییکردووە.
مەبەست زرار، ئامۆزای ئەحمەد عەبدوڵڵا بە تۆڕی میدیایی رووداوی راگەیاند، ئامۆزاکەی بە مەبەستی هێنانەوەی بەروبوومی کوارگ/ قارچک و رێواس چووەتە چیاکان لەگەڵ چەند هاوڕێیەکی و لەوێ جەڵتە لێیداوە.
بە گوتەی ئامۆزاکەی ئەحمەد عەبدوڵڵا، دوای ئەوەی جەڵتەی دڵ لێیداوە، "چووەتەوە لای هاوڕێکانی و گوتوویەتی تەندروستیم باش نییە، دواتر جارێکی دیکە جەڵتە لێیداوەتەوە و گیانی لەدەستداوە."
مەبەست زرار ئاماژەی بەوەش کرد، تەرمی ئامۆزاکەییان بردووەتەوە قەسرێ و ئێستا لە نەخۆشخانەی قەسرێیە و لەوێش پزیشکەکان پشتڕاستیان کردووەتەوە کە مردنەکە بە جەڵتە بووە، گوتیشی، "برای تاقانەی هەشت خوشکە، خێزاندارە و چوار کوڕ و کچێکیشی هەیە."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ