رووداو - هەولێر
وەزارەتی تەندروستیی حکومەتی هەرێمی کوردستان لە راگەیێندراوێکدا دوو تووشبووی دیکەی بە ڤایرۆسی کۆرۆنا لە سلێمانی راگەیاند کە ئەندامی خێزانی ئەو مامۆستا ئایینییەن کە رۆژی چوارشەممە 4-3-2020 گیانی لەدەستدا.
لە راگەیێندراوەکەی وەزارەتی تەندروستیی حکومەتی هەرێمدا هاتووە "لە ماوەی 24 کاژێری رابردوو، ئەمڕۆ پشکنین بۆ 45گومانلێکراو ئەنجامدرا کە لەنێویاندا سێ نەخۆش دەرەنجامی پشکنینی تاقیگەییان پۆزەتیڤ دەرچووە و هەڵگری ڤایرۆسی کۆرۆنای نوێ COVID-19ن، بەداخەوە نەخۆشێکیان تەمەن63 ساڵە و گیانی لەدەستداوە، دوای پشکنین بۆ سەرجەم ئەندامانی خانەوادەکەش دەرکەوت دوو ئەندامی هەمان خانەوادەی خوالێخۆشبوو هەڵگری هەمان ڤایرۆسی کۆرۆنای نوێ COVID-19ن، کە تەمانیان 31 ساڵ و 27 ساڵن".
هەر لە راگەیێندراوەکەدا ئاماژە بەوە کراوە "ئێستا باری تەندروستییان جێگیرە و لەژێر چاودێریی پزیشکیدان". ئێستا کۆی گشتیی هەڵگرانی ڤایرۆسی کۆرۆنا هەشت کەسە کە یەکێکیان گیانی لەدەستداوە.
وەزارەتی تەندروستیی حکومەتی هەرێمی کوردستان دەشڵێ، لە هەرێمی کوردستان ئێستا دوو هەزار و 586 کەس کەرەنتینە کراون لە 27 شوێنی جیاواز لە شارەکانی هەولێر هەزار و 214 کەس، سلێمانی 561 کەس، دهۆک 382 کەس، هەڵەبجە 103 کەس، گەرمیان 176 کەس، راپەڕین 138 کەس و کۆیە 12 کەس.
تیمە تەندروستییەکان بەردەوامن لە چاودێریکردن بۆ چارەسەری پێویست لەکاتی بوونی هەر نیشانەیەکی نەخۆشی و گومانلێکردن.
وەزارەتی تەندروستی جەختی لەوە کردووەتەوە كە پێویستە هەموولایەك پابەندی بڕیارەكانی حكومەتی هەرێمی كوردستان، وەزارەتی ناوخۆ و رێنماییەكانی وەزارەتی تەندروستی و پاڵپشتی تیمەكانی تەندروستی بن بۆ دۆزینەوەی هەر گومانلێكراوێك و گەشتیارێك كە دوورن لە چاوی تیمەكانی تەندروستی.
لە عێراق تاوەکو ئێستا 29 کەس تووشی ڤایرۆسی کۆرۆنا بوون و لە هەرێمی کوردستانیش هەشت کەس تووشبوون کە سەرجەمیان لە شاری سلێمانین؛ لە عێراق دوو کەس بەهۆی کۆرۆناوە گیانیان لەدەستداوە کە لە شاری بەغدا بوون و لە هەرێمی کوردستانیش یەک کەس گیانی لەدەستداوە کە لە سلێمانی بوو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ