رووداو دیجیتاڵ
وەزیرێکی پێشووتری حکومەتی هەرێمی کوردستان لە پشکی حیزبی شیوعیی کوردستان لە نەرویج کۆچی دواییکرد. سکرتێری ئەو حیزبەش دەڵێت، لە هەولێر مەراسیمی تایبەتی بۆ رێکدەخەن.
رۆژی پێنجشەممە 04-05-2023، د. کاوە مەحموود، سکرتێری حیزبی شیوعی کوردستان بە (تۆڕی میدیایی رووداو)ـی راگەیاند، حەیدەر فەیلی، ئەندامی پێشووی مەکتەبی سیاسیی حیزبی شیوعی کوردستان و وەزیری پێشووتری گواستنەوە و گەیاندنی حکومەتی هەرێمی کوردستان بەیانی ئەمڕۆ لە نەرویج بەهۆی نەخۆشییەوە کۆچی دواییکرد.
بەگوتەی سکرتێری حیزبی شیوعی کوردستان، ماوەیەک بووە بارودۆخی تەندروستی باش نەبووە و بۆ وەرگرتنی چارەسەر لە نەخۆشخانەیەکی نەرویج لە ژێر چاودێری چربووە.
د. کاوە مەحموود دەڵێت، بۆ مەراسیمی کۆچی دوایی چاوەڕوانی هەواڵ و زانیاری خێزانەکەین و بە دڵنیاییەوە دوای ئەوە لە هەولێریش مەراسیمی تایبەتی بۆ رێکدەخرێت.
حەیدەر شێخ عەلی غوڵام ناسراو "بە حەیدەر فەیلی" لە ساڵی 1947 لە شاری بەغدا لەدایکبووه، ئامادەیی و پەیمانگای زانستی پیشەسازی هەر لە بەغدا تەواوکردووه.
حەیدەر فەیلی، لە کابینەی چوارەمی حکومەتی هەرێمی كوردستاندا لە ساڵی 1999 تاوەکو 2006 وەزیری گواستنەوە و گەیاندن بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ