هەڵەیەک روویدا! دووبارە هەوڵبدە
رووداو دیجیتاڵ
بۆ یەکەمجار زانکۆی سەلاحەدین، پڕۆسەی وەرگرتنەوەی بڕوانامە دەکاتە ئۆنلاین و دەرچووان دەتوانن لە رێگەی خزمەتگوزاریی گەیاندنەوە بڕوانامەکانیان لە ماڵەوە وەربگرنەوە.
رۆژی دووشەممە، 05ـی کانوونی دووەمی 2026، کارزان کازم، بەڕێوەبەری تۆماری گشتیی زانکۆی سەلاحەدین بە تۆڕی میدیایی رووداوی راگەیاند: "ئەم ساڵ گۆڕانکاریی نوێ لە شێوازی پێدانی بڕوانامە بە دەرچووان کراوە؛ ئەو خوێندکارانەی دەیانەوێت بڕوانامەکانیان وەربگرنەوە، دەتوانن لە رێگەی لینکێکی تایبەتەوە زانیارییەکانیان تۆمار بکەن و داوای بڕوانامەکەیان بکەن."
سەبارەت بە شێوازی گەیشتنی بڕوانامەکان بەدەست دەرچووان، بەڕێوەبەری تۆماری گشتیی زانکۆکە گوتی: "دەرچووان دەتوانن لە رێگەی خزمەتگوزاریی گەیاندنەوە داوای بڕوانامەکانیان بکەن و بۆیان دەنێرینەوە، هەروەها ئەگەر خۆشیان بیەوێت، دەتوانن سەردانی زانکۆ بکەن و وەریبگرنەوە."
ئەم خزمەتگوزارییە کە بۆ یەکەمجارە لە زانکۆی سەلاحەدین پەیڕەو دەکرێت، تەنیا بۆ دەرچووانی نوێ نییە، بەڵکو وەک کارزان کازم ئاماژەی پێ دا: "ئەم ئۆفەرە دەرچووانی ساڵانی پێشوو و خوێندنی ساڵی 2025-2026ـیش دەگرێتەوە."
نرخی گەیاندن بەگوێرەی داواکاری:
بروانامە بە نمرە: 50 هەزار دینار
بروانامەی هەڵواسین: 50 هەزار دینار
پشتگیری دەرچوون 20 هەزار دینار
زانکۆی سەلاحەدین یەکێکە لە کۆنترین و گەورەترین زانکۆکانی هەرێمی کوردستان؛ بەپێی ئامارەکان، ساڵانە زیاتر لە پێنج هەزار قوتابی دەردەچن و بۆ ئەمساڵی خوێندنیش زیاتر لە 26 هەزار خوێندکار لە زانکۆکە دەخوێنن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ