دانیشتوویەکی گوندی سەرگەلێ بۆ رووداو: بەهۆی شەڕەوە نەمانتوانیوە بخەوین.
رووداو دیجیتاڵ
فڕۆکە جەنگییەکان و تۆپخانەکانەکانی تورکیا، سنووری قەزای ئامێدییان لە پارێزگای دهۆک بۆردوومانکرد و گەریلای پارتی کرێکارانی کوردستانیش وەڵامی هێرشەکانیان داوەتەوە. دانیشتوویەکی گوندی سەرگەلێ دەڵێ: بەهۆی شەڕەوە نەمانتوانیوە بخەوین.
بەیانی رۆژی سێشەممە 5-7-2022 فڕۆکە جەنگییەکان و تۆپخانەکانەکانی تورکیا، نزیکەی 10 کاژێر بە بەردەوامی دەوروبەری گوندەکانی سگێری و کانی-یان بۆردوومانکرد و گەریلاکانی پارتی کرێکارانی کوردستانیش بە چەکی دۆشکە تەقەیان لە فڕۆکە تورکییەکان کرد.
رەمزی سەرگەلێی، دانیشتووی گوندی سەرگەلێ بە رووداوی گوت: کاژێر 4:00ی ئێوارەی دوێنێ، تورکیا بە فڕۆکە دەستی بە بۆردوومانکرد و دواتر لە نیوەشەودا دەستی بە تۆپبارانی سنوورەکە کرد کە نزیکەی 10 کاژێری خایاند و تاوەکو بەیانی ئەمڕۆ بەردەوامبوون.
ئەو شوێنەی کە بووە چەقی شەڕ و بۆردوومان، ناوچەیەکی ئاوەدان نییە، بەڵام زۆر نزیکبووە لە گوندەکانی سەرگەلێ، گوانی، بەرچی، کانی و چەند گوندێکی دیکە. ناسر عەلی، بەڕێوەبەری نووسینگەی رووداو لە دهۆک دەڵێ: بەهۆی نزیکی لە ناوەندی شاری ئامێدی، دانیشتووانی شارەکە دەنگی بۆردوومان و تەقەیان بیستووە و دانیشتووانی ئەو گوندانەشی کە نزیکی شەڕ و بۆردوومانەکە بوون، خانووەکانیان بۆ ماوەیەکی کاتی چۆڵکردووە.
رەمزی، دانیشتووی گوندی سەرگەلێیە. لەبارەی هێرشەکانەوە بۆ سنووری گوندەکەی بە رووداوی گوت: نزیکەی دوو ساڵە سوپای تورکیا سنووری گوندەکەمانی کردووەتە ئامانج و لە دوو هەفتەی رابردووشدا هێرشەکانی لەو سنوورە چڕتر کردووەتەوە و لە دوێنێوە نزیکەی 100 تۆپ بەو سنوورەوە نراون.
وارشین سەلمان، قایمقامی قەزای ئامێدی بە رووداوی راگەیاند، بۆردوومانەکە سنووری گوندەکانی سگێری و بناری چیای مەتینی گرتووەتەوە و زیانی گیانی نەبووە، بەڵام دەنگی بۆردوومانەکان خەڵکی هەراسانکردووە.
بەرەبەیانی رۆژی 18ی نیسانی 2022 سوپای تورکیا ئۆپەراسیۆنێکی نوێی بۆ سەر گەریلاکانی پارتی کرێکارانی کوردستان بە ناوی چڕنووک - قوفڵ لە باشووری کوردستان دەستپێکرد.
ئۆپەراسیۆنەکە ناوچەکانی مەتین، زاپ و ئاڤەشین لە باشووری کوردستان دەگرێتەوە و بە گوتەی خولوسی ئاکار، وەزیری بەرگریی تورکیا، سوپای وڵاتەکەی لە رێگەی وشکانی و ئاسمانییەوە هێرشەکانیان ئەنجامدەدەن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ