رووداو - هەولێر
وەزارەتی تەندروستیی عێراق تووشبوونی حەوت کەسی دیکەی بە کۆرۆنا راگەیاند، کە پێنج کەسیان لە بەغدان، کەسێکیان لە سلێمانی و یەکێکی دیکەیشیان لە کەربەلایە.
وەزارەتی تەندروستی عێراق لە راگەیێندراوێکدا ئاماژەی بەوە کردووە، ئەو مامۆستا ئایینییەی رۆژی چوارشەممە لە سلێمانی گیانی لەدەستدا، تووشبووی کۆرۆنا بووە.
لەبارەی ئەو کەسەی لە کەربەلا گیانی لەدەستداوە، وەزارەتی تەندروستی دەڵێت، ئەو کەسەی لە کەربەلا گیانی لەدەستداوە ژنێکی بە تەمەن بووە، بەدەست نەخۆشی درێژخایەنەوە ناڵاندوویەتی و بەم دواییانەش نەشتەرگەری بۆ کراوە.
لە راگەیێندراوەکەی وەزارەتی تەندروستیدا ئەوەشهاتووە، تەواوی رێکارەکانی خۆپارێزی بەپێی رێنماییە تەندروستییە جیهانییەکان بۆ خۆپارێزی لە کۆرۆنا گیراوەتە بەر.
لەبارەی مامەڵەکردن لەگەڵ تووشبووان، وەزارەتی تەندروستی جەختدەکاتەوە، هەموو تووشبووان بۆ شوێنی تایبەت دەگوازرێنەوە و رێوشوێنی یاسایی بەرامبەر ئەوانەی سەرپێچی دەکەن، دەگرێتە بەر.
بە تۆمارکردنی ئەو تووشبووە نوێیانە ئێستا لە هەرێمی کوردستان نۆ تووشبوو هەن کە یەکێکیان گیانی لەدەستداوە و لە عێراقیش 47 کەس تووشبوونە و سێ کەس گیانیان لەدەستداوە کە دووانیان لە بەغدان و کەسێکیشیان لە کەربەلایە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ