رووداو دیجیتاڵ
ئەمڕۆ دوو هێرشی جیا کرایە سەر سنووری قەزای کۆیە لە پارێزگای هەولێر. قایمقامی قەزاکە دەڵێ، هێرشەکان بۆسەر کەمپی ئاشتیی دیموکرات و بارەگای پارتی ئازادیی کوردستان بوون.
حاکم تاریق حەیدەری، قایمقامی قەزای کۆیە، ئەمڕۆ هەینی بە تۆڕی میدیایی رووداوی گوت: "دوای نیوەڕۆی ئەمڕۆ بە شەش درۆن هێرش کرایە سەر کەمپی ئاشتی لە سنوورەکەمان".
هێرشەکە نزیک کاژێر 03:15ـی دوای نیوەڕۆ بوو. قایمقامی کۆیە گوتی: "پێش دەستپێکردنی جەنگ کەمپەکە چۆڵکرا، بۆیە هیچ زیانی گیانی نەبووە".
کەمپی ئاشتی بۆ کەسوکاری پێشمەرگەکانی حیزبی دیموکراتی کوردستانی ئێران دروستکراوە.
قایمقامی کۆیە ئاماژەی بە هێرشێکی دیکەی ئەمڕۆ کرد و گوتی: "پێش نیوەڕۆ بە درۆن هێرش کرایە سەر بارەگای پارتی ئازادیی کوردستان (پاک)، بەڵام پێش ئامانجەکە پێشمەرگەکان تەقەیان کرد و درۆنەکە کەوتە خوارەوە".
جاری یەکەم نییە و دوای جەنگی ئەمریکا و ئیسرائیل بەرامبەر بە ئێران کە ئەمڕۆ حەوت رۆژە بەردەوامە، چەند جارێکی دیکە سنووری قەزای کۆیە بە پاساوی هەبوونی هێزەکانی رۆژهەڵاتی کوردستان بۆردوومان کراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ