کوردستان
پیاوێک لەکاتی بارانبارین چەتری بەدەستەوەیە لە هەولێر. 15-11-2023. وێنە: بڵند تاهیر - رووداو
رووداو دیجیتاڵ
کەشناسیی هەرێمی کوردستان بڵاویکردەوە، سبەی سەرەتای شەپۆلی بارانبارینی ئەم هەفتەیە بەشێوەی گشتگیر دەستپێدەکات. کەشناسێک دەڵێ: "مەترسی لافاو لە چەند ناوچەیەک هەیە."
ئەمڕۆ شەممە 06-12-2025، کەشناسیی هەرێمی کوردستان رایگەیاند، ئەمڕۆ بەراورد بە دوێنێ پلەی گەرما نزیکەی 3 پلەی سیلیزی بەرزدەبێتەوە. ئاماژەی بەوەش کرد، "سبەی ئاسمان هەور دەبێ و لە ناوچە شاخاوییەکان ئەگەر هەیە نمەباران ببارێ."
لەبارەی کەشوهەوای سبەیەوە کەشناسی دەڵێ، "ئاسمان هەوری باراناوی دەبێ؛ بارانبارین بە شێوەی نمەباران و بارانی مامناوەند سەرەتا لە رۆژئاوای هەرێمی کوردستانەوە دەستپێدەکات پاشان هەموو ناوچەکان دەگرێتەوە."
شاڵاو هیدایەت، شارەزای کەشناسی، ئەمڕۆ بە تۆڕی میدیایی رووداوی گوت، "شەپۆلەکە بە گشتیی بەهێز دەبێ و تاوەکو کۆتایی دێت بەگوێرەی ناوچەکان، پێشبینی دەکرێ لە 80 بۆ 200 ملیمەتر باران ببارێ."
ئەو کەشناسە پێشبینی کرد، "ئەو ناوچانەی لە شارە جیاوازەکان ساڵانی رابردوو لافاویان تێدا دروستبووە، لەم شەپۆلەدا مەترسیی لافاویان لەسەر دەبێت."
پێشبینی بڕی بارانبارین
بەگوێرەی راگەیێندراوی دوێنێی کەشناسیی هەرێمی کوردستان، "پێشبینی دەکرێ رۆژی شەممە زۆرترین بڕی باران لە ئیدارەی سۆران ببارێ کە بڕەکەی 20 بۆ 30 میلیمەتر دەبێت."
کەشناسی رایگەیاندووە، "رۆژی دووشەممە بارانبارین بەردەوام دەبێت و لە ناوچە شاخاوییەکانی هەولێر و دهۆک باران بە لێزمە دەبارێت کە ئەگەری دروستبوونی لافاو هەیە لەو ناوچانەی بارانی زۆریان تێدا دەبارێ."
بەڕێوەبەرایەتییەکە هۆشداری لە بارانبارینی رۆژی سێشەممە دەدات و ئاماژە بەوە دەکات: "لە نیوەڕۆوە تا درەنگی شەوی سێشەممە لەسەر چوارشەممە، بارانی بەخوڕ و بەلێزمە دەبارێ و هۆشداری لە دروستبوونی لافاو لە ناوچە جیاوازەکانی سلێمانی، هەڵەبجە و گەرمیان دەدرێت."
کەشناسی پێشبینیی کردووە، چوارشەممە بارانی بەلێزمە ببارێ و پێنجشەممەش شەپۆلەکە کۆتایی بێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ