هەرێم کەمال ئاغا، ئەندامی سەرکردایەتی و سەرۆکی فراکسیۆنی یەکێتیی نیشتمانیی کوردستان لە پەرلەمانی عێراق
رووداو دیجیتاڵ
ئەندامێکی سەرکردایەتیی یەکێتی رایگەیاند، ئەم هەفتەیە کۆبوونەوەی پەرلەمانی کوردستان بۆ دەنگدان بە گۆڕانکارییە حکومییەکان دەکرێت و هەفتەی داهاتوو مەکتەبی سیاسیی یەکێتی و پارتی کۆدەبنەوە.
رۆژی دووشەممە 09-01-2023 هەرێم کەمال ئاغا، ئەندامی سەرکردایەتی و سەرۆکی فراکسیۆنی یەکێتیی نیشتمانیی کوردستان لە پەرلەمانی عێراق میوانی بوولتەنی کاژێر 12:00ی تۆڕی میدیایی رووداو بوو، کە سەنگەر عەبدولڕحمان پێشکێشی دەکات و، رایگەیاند، "هەندێک کێشە لەبارەی هەندێک دۆسیەی تایبەت رێگربوون لەپێش کۆبوونەوەی یەکێتی و پارتی، بەڵام لە ماوەی رابردوودا کۆبوونەوەی دوو قۆڵی و دوور لە راگەیاندنەکان هەبووە و گفتوگۆیان لەبارەی گلەییەکانیان لە یەکدی کردووە."
بە گوتەی ئەو ئەندامەی سەرکرادیەتیی یەکێتی، ئەم هەفتەیە پەرلەمانی کوردستان بۆ دەنگدان لەبارەی گۆڕانکارییە حکومییەکان کۆدەبێتەوە، کە قۆناخێکە لە رێککەوتنەکان و هەفتەی داهاتوو مەکتەبی سیاسیی یەکێتی و پارتی کۆدەبنەوە.
هەرێم کەمال ئاغا، ئێستا بە باشترین کات بۆ کۆبوونەوەی یەکێتی و پارتی دەزانێت و دەڵێت، "ئەم قۆناخە قۆناخێکی تەندروست نییە بۆیە لە هەموو کاتێک گرنگترە یەکێتی و پارتی و لایەنە سیاسییە کوردییەکان ئەم قۆناخە بە قۆناخێکی گرنگ و هەستیار بخوێننەوە، لەگەڵ بەغدا کۆمەڵێک پرس لە نێوانماندا هەیە گرنگترینیان بودجەیە، رۆژانە لە دەوروبەرمان درۆن و تۆپباران هەیە بۆئەوەی هەموو ئەوانە چارەسەر بکەین، پێویستە لایەنەکان یەکگرتوو و کۆدەنگ بن."
ئەو ئەندامەی سەرکردایەتیی یەکێتیی نیشتمانیی کوردستان نەیشاردەوە کە ئەم ماوەیە یەکێتی و پارتی لە پەڕاوێکدا گلەییەکانیان لەبارەی بەڕێوەبردنی هەرێمی کوردستان، بابەتی دارایی، سیاسەتی هەرێمی کوردستان لە دەرەوە و ناوخۆ بۆ یەکدی ناردووە و هەردوولا کاریان لەسەر چارەسەرکردنی گلەییەکان کردووە و بڕیاردراوە کار لەسەر گلەیی و تێبینیەکانی یەکدی بکەن.
لەبارەی گەڕانەوەی قوباد تاڵەبانی، جێگری سەرۆکی حکومەتی هەرێمی کوردستان بۆ کۆبوونەوەکانی ئەنجوومەنی وەزیران، هەرێم کەمال ئاغا گوتی، "ئەگەر گلەیی و داواکارییەکانی یەکێتیش لەلایەن پارتی جێبەجێ بکرێن، ئەوە قوباد تاڵەبانییش دەگەڕێتەوە کۆبوونەوەکانی حکومەت، دواجار ئەو یەکێکە لەو کەسانەی قوربانیی زۆری داوە بۆئەوەی یەکگرتوویی بپارێزێت."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ