رووداو دیجیتاڵ
پارێزگاری ورمێ رایگەیاند، بەهۆی زریان و تەرزەوە چوار تریلیۆن تمەن، (زیاتر لە 48 ملیۆن دۆلار) زیان بە کەرتی کشتوکاڵی پارێزگاکە گەیشتووە.
پێنجشەممە 08-05-2025، رەزا رەحمانی، پارێزگاری ورمێی رۆژهەڵاتی کوردستان سەردانی باخ و زەوییە کشتوکاڵییەکانی مهابادی کرد و رایگەیاند، ''بەهۆی تەرزە و زریان، بەتایبەتی لە شارەکانی پیرانشار، مهاباد، بارووق، نەغەدە، بۆکان، چوار بورج و میاندواو، زیاتر لە 30 هەزار هیکتار زەوی زیانیان بەرکەوتووە.''
مهاباد یەکێک لەو شارانە بوو کە تێیدا جووتیاران بەهۆی تەرزە و زریانەکەوە زۆرترین زیانیان بەرکەوت. رەزا رەحمانی ئاماژەی بەوە کرد، زۆربەی ئەو باخانەی زیانیان بەرکەوتووە، تاوەکو دوو ساڵی دیکەیش بەرهەمیان نابێت، ''تەنیا لە مهاباد نزیکەی 11 هەزار هێکتار زەوی و باخ، 70٪ بۆ 100٪ـیان لەنێوچوون.''
پارێزگاری ورمێ داوا لە مەسعود پزیشکیان، سەرۆککۆماری ئێران دەکات بۆ قەرەبووکردنەوەی بەشێک لە زیانەکانی جووتیاران، هاوکاریی پارێزگاکە بکات.
رەزا رەحمانی گوتیشی، بەگشتی تەرزە و زریانی ئەم دواییانە زیاتر لە چوار هەزار ملیار تمەن، زیانی بە کەرتی کشتوکاڵیی پارێزگاکە گەیاندووە، کە دەکاتە زیاتر لە 48 ملیۆن دۆلار.
لە 27ـی نیسانەوە، شەپۆلێکی باران و تەرزە زۆربەی ناوچەکانی رۆژهەڵاتی کوردستان و ئێرانی گرتەوە و چەند رۆژێک بەردەوام بوو کە بەهۆی درووستبوونی لافاو، بارینی تەرزە و هەڵکردنی با و زریانی بەهێز لە چەندین ناوچە، زیانێکی زۆر بە باخ و زەوییە کشتوکاڵییەکان گەیشت و لانیکەم 10 کەس گیانیان لەدەستدا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ