کوردستان
نێچیرڤان بارزانی لەگەڵ ئیدریس نێچیرڤان بارزانی، سەرۆک و دامەزرێنەری دەزگای روانگە و حەسەن شێخ عەلائەدین، بەڕێوەبەری جێبەجێکاری دەزگاکە
رووداو دیجیتاڵ
سەرۆکی هەرێمی کوردستان لەگەڵ تیمی دەزگای روانگە کۆبووەوە و ستایشی کار و چالاکییەکانیانی کرد، بەتایبەتی لە بواری پێگەیاندنی گەنجان و کەرتی پەروەردەدا. نێچیرڤان بارزانی رایگەیاند، هەموو پشتگیرییەک بۆ سەرخستنی پڕۆژەکانیان دەکات.
پێشنیوەڕۆی ئەمڕۆ سێشەممە، (9-12-2025)، نێچیرڤان بارزانی، سەرۆکی هەرێمی کوردستان لە هەولێر پێشوازی لە تیمی دەزگای روانگە کرد.
بەگوێرەی راگەیێندراوی سەرۆکایەتیی هەرێمی کوردستان، لە دیدارەکەدا تیمی دەزگاکە پوختەیەکیان لەبارەی کار و چالاکییەکانی ئێستا و پلان و بەرنامەکانی داهاتوویان خستەڕوو. تیشک خرایە سەر ئەو بوارانەی دەزگاکە تێیدا خزمەت دەکات، لەوانە: خێرخوازی، دەستگیرۆیی لێقەوماوان، تواناسازیی گەنجان، توێژینەوە، خوێندن و پەروەردە، کولتوور، دۆزینەوەی هەلی کار، ژینگەپارێزی و تەندروستی لە سەرانسەری هەرێمی کوردستان و عێراقدا.
نێچیرڤان بارزانی، وێڕای دەستخۆشی، ستایشی کار و خزمەتەکانی دەزگای روانگەی کرد، "بەتایبەتی لە بواری پشتگیریکردن و پێگەیاندنی گەنجان و هاوکاریکردنی کەرتی پەروەردە و برەودان بە تواناسازیی لاوان."
سەرۆکی هەرێمی کوردستان هیوای سەرکەوتنی بۆ خواستن و "هەموو پشتگیرییەکی بۆ بەردەوامی و سەرخستنی کار و پڕۆژەکانیان دووپات کردەوە."
لەلایەن خۆیانەوە تیمی دەزگای روانگە، سوپاس و پێزانینیان بۆ پشتگیری و هاندانی بەردەوامی نێچیرڤان بارزانی بۆ کار و چالاکییەکانیان دەربڕی و جەختیان کردەوە کە بە هەموو توانایەک بەردەوام دەبن لە خزمەتکردن لە بوارە جیاوازەکاندا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ