رووداو دیجیتاڵ
سەرۆکی ئەنجوومەنی کوردی لەکاتی سەردان و کۆبوونەوەی لەگەڵ مەترانی سریانی ئۆرتۆدۆکسی جەزیرە و فورات لە حەسەکە رایگەیاند، "دەبێت سووریای نوێ فرە نەتەوە بێت."
رۆژی 10-02-2025 شاندێکی لقی رۆژهەڵاتی حەسەکەی ئەنجوومەنی نیشتمانیی کوردی لە سووریا بە سەرۆکایەتیی محەممەد ئیسماعیل، سەرۆکی ئەنجوومەن سەردانی مەتران مار مۆریس عەمسیحی، مەترانی جەزیرە و فوراتی سریانی ئۆرتۆدۆکسی کرد.
ئەنەکەسە رایگەیاند، محەممەد ئیسماعیل باسی دیدگای سیاسیی ئەنجوومەنی کوردی بۆ داهاتووی سووریا کرد و جەختی لەسەر "پێویستیی پاراستنی پێکەوەژیان و ئاشتیی کۆمەڵایەتی لەنێوان پێکهاتەکانی ناوچەکە کردەوە" و ئاماژەی بەوەدا، پێکهاتەکان تەواوکەری یەکترن و پێویستیان بە یەکدی هەیە.
محەممەد ئیسماعیل ئاماژەی بە مێژووی هاوبەشی نێوان پێکهاتەکانی ناوچەکە کرد و رایگەیاند، "هەندێک سیاسەت بەستەڵەکی لە نێوان پێکهاتەکان دروستکردووە. ئێمە هەوڵدەدەین ئەم بەستەڵەکە بشکێنین".
سەرۆکی ئەنجوومەنی کوردی گوتی: "رژێم سامانی ناوچەکانی ئێمەی دەدزی و گەلانی ناوچەکەی برسی دەکرد، ئێستاش سەرەڕای بوونی هەندێک ترس لەلای هاووڵاتییان، گەشبینین بە داهاتوو".
سەرۆکی ئەنەکەسە داوای کرد: "دەبێت سووریای داهاتوو مەدەنی بێت، فرەنەتەوە و فرەئایین و فرە تایەفە بێت و لایەنگیری نەکات لەهەمبەر هیچ ئایینێک".
بە گوێرەی راگەیاندنی ئەنەکەسە، مەتران مار مۆریس عەمسیحی ئاماژەی بە پەیوەندییە مێژووییەکانی نێوان گەلی سریانی و گەلی کورد کرد و جەختی لەسەر پێویستیی گەیشتن بە دەوڵەتێکی مەدەنی کردەوە کە هەموو سوورییەکان بە هەموو پێکهاتەکانیانەوە لەخۆ بگرێت.
مەتران گوتوویەتی: "ئێمە بە سەدان ساڵە وەک برا پێکەوە دەژین و سیاسەتە جیاوازەکان نەیانتوانیوە فیتنە لەنێوانماندا دروست بکەن."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ