زانکۆی سەلاحەددین: بۆ کردنەوەی بەشە ناوخۆییەکان چاوەڕێی وەزارەتی تەندروستین

 

پرۆفیسۆر دکتۆر جەوهەر فەتاح، سەرۆکی زانکۆی سەلاحەددین بە تۆڕی میدیایی رووداوی راگەیاند، بەهۆی بڵاوبوونەوەی پەتای کۆرۆنا، کردنەوەی بەشە ناوخۆییەکان لە زانکۆ ئەرک و بەرپرسیارێتییەکی گەورەیە، بەتایبەتی لەو زانکۆیانەی قوتابییان زۆرە، وەک زانکۆی سەلاحەددین، بۆیە چاوەڕێی رێنمایی وەزارەتی تەندروستین بۆ ئەوەی لەسەر ئاستی کوردستان رێنمایی خۆپارێزی تەندروستی دەربکات لەبارەی چۆنێتی گرتنەبەری رێکارە تەندروستی و خۆپارێزییەکان بۆ کردنەوەی بەشە ناوخۆییەکان.

 

سەرۆکی زانکۆی سەلاحەددین زیاتر روونیکردەوە، وەزارەتی خوێندنی باڵا نووسراوی بۆ وەزارەتی تەندروستی کردووە بۆ ئەوەی لیژنەیەکی باڵای پسپۆڕ رێکار و رێنمایی خۆپارێزی دەربکات لەسەر ئاستی کوردستان لەبارەی چۆنییەتی رێکارەکانی خۆپارێزی لە بەشە ناوخۆییەکاندا.

 

پرۆفیسۆر دکتۆر جەهەر فەتاح  ئاماژەی بەوەشکرد، جگە لەوە سیستەمی میوانداریکردن هەیە، هەر قوتابییەک ماڵی لە سنووری هەر زانکۆیەک نزیک بێت، ئەوا دەتوانێت ئەمساڵ لەو زانکۆیە درێژە بە خوێندن بدات نەک زانکۆکەی خۆی. هەروەها ئەگەر رێنماییش دەرچوو ئەوا بەشە ناوخۆیی دەدرێتە ئەو قوتابییانەی 35 کم زیاتر لە زانکۆ دوورن، بەو مەرجەی لە نزیکترین شوێن لەو زانکۆیەدا ئەو بەشە نەبێت کە قوتابییەکە تێیدا دەخوێنێت. جگە لەمەش ئەمساڵ سیستەمی ئاوێتە پەیڕەو دەکرێت قوتابی هەموو رۆژێک لە هۆڵەکانی خوێندن نییە، بەشێک لە خوێندنەکەی ئەلکیترۆنی و ئۆنلاین دەبێت.