مەسعود نزووری، خەڵکی گوندی نزووری سەر بە قەزای باتیفای ئیدارەی سەربەخۆی زاخۆ قسە بۆ غەریب مەجید، پەیامنێری رووداو دەکات.
رووداو دیجیتاڵ
هاونیشتمانییەکی خەڵکی ناوچە سنوورییەکانی ئیدارەی سەربەخۆی زاخۆ لەبارەی بڕیاری خۆهەڵوەشاندنەوەی پەکەکە دەڵێت، ''باشترین بڕیار بوو و لە بەرژەوەندیی هەموو کوردستاندایە''؛ گوتیشی، شەڕی پەکەکە و سوپای تورکیا زیاتر لە هەر شوێنێک زیانی بە زاخۆ گەیاندووە.
ئەمڕۆ دووشەممە 12-05-2025، پارتی کرێکارانی کوردستان (پەکەکە) ئەنجامی کۆنگرەی 12ـی خۆی راگەیاند کە گرنگترین خاڵی، خۆهەڵوەشاندنەوە و چەکدانانی پارتەکە بوو.
پارتەکە لەدوای زیاتر لە 40 ساڵ خەبات، لە راگەیێندراوی کۆتایی کۆنگرەکەیدا دەڵێت، بڕیاری خۆهەڵوەشاندنەوەی داوە، چەک دادەنێت و "خەباتکردن بە ناوی پەکەکەوە کۆتایی دێت."
یەکێک لە کاریگەرییە سەرەکییەکانی چەکدانانەکەی پەکەکە، گەڕانەوەی خەڵکی گوندە سنوورییەکانی نێوان باکوور و باشووری کوردستان دەبێت کە بەهۆی شەڕ و پێکدادانەوە گوندەکانیان چۆڵکردوون.
مەسعود نزووری، خەڵکی گوندی نزووری سەر بە قەزای باتیفای ئیدارەی سەربەخۆی زاخۆ بە غەریب مەجید، پەیامنێری تۆڕی میدیایی رووداوی گوت: ''زۆر بە بڕیارەکە دڵخۆش بووین، ئێمە حەز دەکەین لێکتێگەیشتن دروست ببێت، نەک شەڕ.''
مەسعود نزووری گوتیشی: ''لە ساڵی 1991ـوە بەهۆی فڕۆکە، شەڕ و بۆردوومانکردن هیچ خۆشیمان لە ژیانی خۆمان نەبینیوە، هیوادارین بگەڕێینەوە سەر گوندەکانی خۆمان.''
محەممەد موراد، هاونیشتمانییەکی دیکەی خەڵکی قەزای باتیفا بە رووداوی راگەیاند، ''پێموایە هەڵوەشانەوە و چەکدانانی پەکەکە باشترین بڕیار بوو و لە بەرژەوەندیی هەر چوار پارچەی کوردستاندایە.''
زۆربەی گوندەکانی سەر بە قەزای باتیفا لە چەند ساڵی رابردوودا بەهۆی شەڕی پەکەکە و سوپای تورکیا چۆڵکراون، ئەو هاونیشتمانییە دەڵێت: "ئێمە هەمووان چاوەڕێن بڕیاری هەڵوەشانەوەی پەکەکە بچێتە بواری جێبەجێکردنەوە، بۆ ئەوەی بگەڕێینەوە گوندەکانمان.''
محەممەد موراد ئاماژەی بەوە کرد، شەڕی نێوان پەکەکە و تورکیا نزیکەی 30 ساڵە سنووری ئیدارەی سەربەخۆی زاخۆی گرتووەتەوە و ''تێیدا ئێمە لە هەموو ناوچەکانی دیکە زیاتر زەرەرمەند بووین.''
لە سنووری ئیدارەی سەربەخۆی زاخۆ زیاتر لە 32 گوندی هەن کە کەوتوونەتە ژێر کاریگەریی شەڕی نێوان پەکەکە و سوپای تورکیا و بەشێکیان بە تەواوی چۆڵکراون.
بەگوێرەی زانایارییەکانی ئەگەر بڕیاری کۆنگرەی 12ی پارتی کرێکارانی کوردستان جێبەجێ بکرێت، کە خۆهەڵوەشاندنەوە و چەکدانانە، 602 گوند لە باشووری کوردستان ئاوەدان دەبنەوە، کە بەهۆی شەڕی پەکەکە - تورکیا چۆڵ کراون یان مەترسیی چۆڵبوونیان لەسەرە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ