یەکگرتووی ئیسلامی: کورسییەکەی زاخۆمان بردەوە

رووداو دیجیتاڵ

ئەندامێکی شاندی چاودێریی یەکگرتووی ئیسلامی کوردستان لە بەغدا رایگەیاند، کێشەی کورسییەکەی زاخۆ لە بەرژەوەندی یەکگرتوو یەکلابوویەوە و عومەر کۆچەر سەرکەوتنی بەدەستهێنا.

د. موسەننا ئەمین، بەربژێری سەرکەوتووی یەکگرتوو و ئەندامی شاندی چاودێریی ژماردنەوەی دەنگەکان لە بەغدا لە فەیسبووکی خۆی نووسیویەتی: "کێشەی کورسییەکەی زاخۆ لە بەرژەوەندیی یەکگرتوو یەکلابوویەوە و دوای ژماردنی 88 سندووق کە کێشەی تێدا بوو دەرنجام، بەربژێرەکەی یەکگرتوو سەرکەوت".

بەگوتەی موسەننا ئەمین ئەنجامەکان بەمشێوەن کە عومەر کۆچەر 4 هەزار و 36 دەنگ، عەبدولواحید ئەحمەد سلێڤانەیی 3 هەزار و 53 دەنگ و جیاوازییەکانیان 936 دەنگە.

لەوبارەوە هاوار محەممەد، بەرپرسی بەشی یاسایی لە دەزگای هەڵبژاردنی پارتی دیموکراتی کوردستان بە تۆڕی میدیایی رووداوی راگەیاند: "راستە ئێستا بەربژێرەکەی یەکگرتوو لەپێشە بەڵام ژماردنی دەنگەکان کۆتایی نەهاتووە و یەکلایی نەبووەتەوە. چاوەڕێ دەکەین کۆمیسیۆن بە فەرمی ئەنجامەکان رابگەیێنێت و ئەوکاتە روون دەبێتەوە".

لە بازنەی دووەمی دهۆک کە زاخۆیە، سەگڤان یوسف، بەربژێری پارتی دیموکراتی کوردستان بە پلەی یەکەم سەرکەوتووە، بەڵام لەسەر پلەی دووەم، رکابەرییەکی تووند لەنێوان عەبدولواحید ئەحمەد، بەربژێری پارتی و عومەر کۆچەر، بەربژێری سەربەخۆ (یەکگرتوو پاڵپشتی دەکات) هەیە.