رووداو دیجیتاڵ
پارێزەرێکی حوکمدراوانی بادینان دەڵێت، سێ لە گیراوانی بادینان کە بڕیاربوو ئەمڕۆ ئازاد بکرێن، ئازادکران.
کامەران سارمەمی، پارێزەرێکی حوکمدراوانی بادینان ئەمڕۆ (پێنجشەممە، 16-03-2023) بە رووداوی گوت، سێ حوکمدراوی بادینان بە ناوەکانی: ئەیاز کەرەم، هاریوان عیسا و شڤان سەعید ئازادکران.
بەیانی ئەمڕۆ بەشدار حەسەن پارێزەرێکی دیکەی حوکمدراوانی بادینان بە رووداوی گوت، ئەیاز ئەکرەم تۆمەتێکی دراوەتە پاڵ و رەنگە دادگایی بکرێت. بەڵام کامەران سارمەمی پارێزەرێکی دیکەی حوکمدراوان کە لەگەڵیاندا بووە گوتی:" بەڵێ لەلایەن پۆلیسەوە تۆمەتێکی دراوەتە پاڵ، بەڵام کە سەردانی ئاسایشی هەولێرمان کرد، بە ئێمەیان گوت هیچ دۆسیەیەکی لای ئێمە نییە و کاژێر 02:00ـی دوانیوەڕۆ ئازادیان دەکەین، قسەکەشیان دروست بوو و ئەوکاتە ئازاد کران".
دادگای تاوانی هەولێر، رۆژی 16-2-2021 بە تۆمەتی "تێکدانی ئاسایشی نیشتمانی" هەریەک لە شێروان شێروانی، ئەیاز کەرەم، گوهدار محەممەدئەمین، هاریوان عیسا و شڤان سەعیدی بە شەش ساڵ زیندانیکردن سزا دا.
مانگی شوباتی 2022 حوکمدراوانی بادینان بە فەرمانی نێچیرڤان بارزانی، سەرۆکی هەرێمی کوردستان 60%ـی سزاکەیان لەسەر کەمکرایەوە، جگە لە شێروان شێروانی کە 50% بوو، بەگوێرەی ئەو بڕیارەش، ئەمڕۆ ئەو سێ حوکمدراوە ئازادکران. تەنیا گوهدار زێباری نەبێت کە دوێنێ لەلایەن دادگای تاوانی هەولێر بە حەوت مانگی دیکە زیندانیکردن، حوکمدرا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ