گفتوگۆی رووداو لەگەڵ لەتیف رەشید
رووداو دیجیتاڵ
سەرۆککۆماری عێراق دەڵێت، بڕیاردراوە و لە چەند رۆژی داهاتوودا بەغدا 400 ملیار دینارەکە بۆ هەرێمی کوردستان دەنێرێت.
لەتیف رەشید، سەرۆککۆماری عێراق لە هەڤپەیڤینێکدا لەگەڵ تۆڕی میدیایی رووداودا کە سەنگەر عەبدولڕەحمان ئەنجامیدا، باسی لە بودجە و مووچەی فەرمانبەرانی لە ساڵی 2023 و ناردنی 400 ملیار دینارەکە کرد.
لەتیف رەشید باسی لە بەربەستەکانی بەردەم ناردنی 400 ملیارەکە کرد و دەڵێت، "هەموو شتێک لە عێراق نەختێک رۆتیناتی تێدایە.. راستە ئەنجوومەنی وەزیران رەزامەندی داوە و ناردووشیەتی، بەڵام لە وەزارەتی دارایی دەبێت بڕیاریی لەسەر بدرێت."
سەرۆککۆماری عێراق باسی پەیوەندییەکانی پارتی و یەکێتی کرد و گوتی: زۆر جار لە سۆشیاڵمیدیا کێشەکان گەورەتر دەکرێن، ئەوەش تێنەگەیشتنە لە کاروباری حیزبی. "لەگەڵ سەرۆکوەزیرانی هەرێمی کوردستان باسی کێشەکانم کردووە و لەگەڵ خەڵکی دیکەش باسم کردووە، ئێمە تاوەکو لەنێوخۆ بەهێزتربین، لە رووی بودجە و جێبەجێکردنی بڕیارەکانی دیکەوە بەهێز دەبین. بۆیە هیوادارم ئەم پەیامە بگاتە هەموو لایەنەکان: پێویستمان بە یەکێتییەکی بەهێز هەیە بۆ ئەوەی یەک دەنگ بەکاربهێنین لە بەغدا."
دەقی هەڤپەیڤینی رووداو لەگەڵ د. لەتیف رەشید، سەرۆککۆماری عێراق
رووداو: ئامانجتان لە بەشداریکردن لە کۆڕبەندی داڤۆس چییە؟
د. لەتیف رەشید: داڤۆس شارێکی بچووکە لە سویسرا و ئەمە چەندین ساڵە دەستیانکردووە بەمەی کۆڕبەندێکی تێدا بکەن بۆ ئەوەی باسی ئەو مژارە گرنگانە بکەن کە لە وڵاتاندا روودەدات. یەکەمجار کە کۆڕبەندەکە دەستیپێکرد، سەرەتا لەسەر ئابووری گفتوگۆیان دەکرد، بەڵام لەم چەند ساڵەی دواییدا، کۆمەڵێک کێشەی دیکە کە هاتوونەتە پێش، چ لە رووی ئابووریی یان لە رووی سیاسی، کۆمەڵایەتی و تەندروستییەوە، ئەو بابەتانەی گرنگن و پێویستە چارەسەریان بۆ بدۆزرێتەوە یان باسیان بکرێت، بۆ ئەوەی خەڵک زیاتر ئاگاداربن، لەوەی لە داڤۆس باسدەکرێن. هەندێجار بەشێوەی کۆبوونەوە و هەندێجاریش بەشێوەی وانەگوتنەوەیە یان بە شێوەی پانێڵە. پانێڵەکان گرنگن، چونکە بۆچوونی جیاوازی تێدا باسدەکرێن و بۆ ئەو کەسانەی گوێی لێدەگرن، ئەم بابەتە هەڵدەبژێرن کە بەکەڵکیانە و سوودی لێ دەبینن. ئێمە کە بەشداری کۆڕبەندەکە بووین، وەکو دەزانن ماوەیەکی زۆر بودجەی عێراق دواکەوت و هەروەها کۆمەڵێک کێشەمان لە عێراقدا هەیە، لە رووی ژێرخان و خزمەتگوزاری و کۆمەڵیک شتەوە کە پێویستە بە زوویی جێبەجێبکرێن بۆ ئەوەی گەلی عێراق سوودیان لێ ببینن، حکومەتی عێراقیش زۆر پێداگرە لەوەی ئەم بابەتانە جێبەجێبکرێن و لەناو بەرنامەی حکومەتی عێراقیشدا ئاماژەیان پێدراوە. ئێمە هاتووین پەیوەندی دروستدەکەین و هانی کۆمەڵێک کۆمپانیا و وڵاتان دەدەین بۆ ئەوەی لەگەڵمان بەشداربن بۆ جێبەجێکردنی ئەم پرۆگرامەی حکومەتی عێراق ئێستا دایناوە.
رووداو: لە رووی ئابووری و سیاسی و تەنانەت کەشوهەواوە؛ عێراق ئێستا کێشەی هەیە، چۆن دەتوانن سوود لەم بەشدارییەتان وەربگرن بۆ راکێشانی سەرنجی وڵاتان و کۆمپانیا گەورەکان بۆ ئەوەی هاوکاریی عێراق بکەن؟
لەتیف رەشید: من زۆر پێی گەشبینم؛ کە لەدوای هەڵبژاردنی ئەمجارەی عێراق و دروستکردنی حکومەتی نوێ کە بەرنامەی حکومەت راگەیێندرا، گرنگییەکی زۆر هەیە بۆ عێراق و زۆربەی وڵاتان و تەنانەت کۆمپانیاکانیش پابەندن بەوەی لەگەڵ حکومەتی عێراق بەشداربن بۆ چاککردنی باری کەرتی خزمەتگوزاری و ژێرخانی عێراق، جگە لەمە کۆمەڵێک بابەتی دیکە هەن کە پێویستە باشبکرێن، ئەوانیش کۆمەڵێک مەرجیان هەیە و ئێمەش بە هەمانشێوە هەندێک مەرجمان هەن، بەڵام هیوادارین کە بگەینە ئەنجامێکی باش بۆ چارەسەرکردنی ئەم شتانەی کە پێویستە لە عێراقدا بکرێت. ئەوەی دەمەوێ سەرنجی بخەمەسەر، حکومەتی عێراق زۆر رژدە و بانگەوازی بۆ زۆربەی کۆمپانیاکان کردووە بۆ ئەوەی لەگەڵمان بەشداربن بۆ ئاوەدانکردنەوەی عێراق بەشێوەیەکی رێکوپێک و یارمەتیمان بدەن بۆ ئەوەی ژێرخانی عێراق بکەوێتە ئاستێکی باش کە خەڵکی عێراق سوودی لێ وەربگرن. هاوکات کۆمەڵێک خزمەتگوزاری نوێ بێتە پێشەوە بۆ ئەوەی کەڵکی لێ وەربگرین.
رووداو: یەکێک لە کارە گرنگەکانی ئێوە چاودێریکردنی جێبەجێکردنی دەستووری عێراقە، چی دەکەن بۆ جێبەجێکردنی ئەو مادە دەستوورییانەی کە بەتایبەتی پەیوەندی بە هەرێمی کوردستانەوە هەیە، لەوانە مادەی 140؟
د. لەتیف رەشید: نەک هەر مادەی 140، بەڵکو کۆمەڵێک شتی دیکەش هەیە. حکومەتی عێراق زۆر رژدە بۆ ئەوەی تاڕادەیەک ئەو دۆسیانەی پێویستە بکرێتەوە و چارەی بکرێت، دەستیکردووە بە کردنەوەیان. بۆ نموونە ئێستا پەیوەندیی نێوان هەرێم و حکومەتی فیدڕاڵی لە عێراق رۆژ لەدوای رۆژ بەهێزتر دەبێت و رەنگە هەموو ئاگاداربن کە چەندینجار وەفدی کوردستان هاتووەتە بەغدا و گفتوگۆیان کردووە و لەسەر کۆمەڵێک بابەت رێککەوتوون. هەندێک بابەتی دیکە کاتی دەوێت لەبەر ئەوەی پەیوەندی بە پەرلەمان و لێ وردبوونەوە و بڕیاردانەوە هەیە و هەندێکیشیان پەیوەندی بە سەرژمێریی خەڵکەوە هەیە. ئەو دۆسیانە هەموو کراونەتەوە و باسیان لێوەکراوە و هەمووشی پەیوەندی بەمەوە هەیە، کە چەند پەیوەندی نێوان هەرێم و حکومەتی فیدڕاڵی لە بەغدا بەهێزە. بیروباوەڕەکان دەگۆڕنەوە و ئەگەر کێشەیەکیش هەبێت بیخەنە بەرچاوی یەکدی بۆ ئەوەی چارەسەری بکەن. تاوەکو هاوکاری نێوانیان بەهێزتربێت، کێشەکان زووتر چارەسەردەکرێن.
رووداو: ئێستا گفتوگۆی نێوانیان بەردەوامە، بەڵام هێشتا کێشەکانی نێوانیان چارەسەرنەبووە، بەتایبەت لەسەر بابەتی بودجەی ساڵی 2023 و یاسای نەوت و گاز، چی دەکەن بۆ ئەوەی بەشە بودجەی هەرێمی کوردستان لە ساڵی 2023 بچەسپێت و پارە بێت بۆ هەرێمی کوردستان؟
د. لەتیف رەشید: من زۆر گەشبینم بە چارەسەربوونی ئەو کێشانە، ناوە ناوە لەگەڵ سەرۆکوەزیران دادەنیشم و لەگەڵ بەرپرسەکانی دیکەش لە بەغدا کۆدەبمەوە و لەگەڵ حکومەتی هەرێمیش پەیوەندیم باشە، هەموو ئەو بابەتانەیان باس کردووە. هەندێکیان لەوانەیە بە زوویی جێبەجێبن، بەڵام هەندێکیشیان کاتیان پێویستە. بابەتی بودجە هێشتا رادەستی پەرلەمان نەکراوە بۆ ئەوەی بڕیاری لەسەر بدات و جێبەجێ بکرێت، هیوادارم زۆر نەخایەنێت و بودجە پەسند بکرێت. لەسەر بودجەش حکومەتی هەرێم و حکومەتی فیدڕاڵی بیروڕایان گۆڕیوەتەوە. خاڵێکی دیکە کە زۆر گرنگە، هەردوولا پێداگری دەکەن، دەبێت یاسای نەوت و گاز بچێتە پەرلەمان، وابزانم خەریکن بەندەکانی دەنووسنەوە.
رووداو: بەپێی رێککەوتنەکە دەبێت لە ماوەی شەش مانگدا ئامادەبێت؟
د. لەتیف رەشید: لە ماوەی شەش مانگ کەمتر یان هەندێک زیاتر، دەبێ جێبەجێ بکرێت. ئەوانە هەمووی پلانیان بۆ دانراوە و خراونەتە بەرنامەوە. هەندێکی وەکو باسمکرد، بە زوویی جێبەجێ دەکرێن، بۆ نموونە ئەو 400 ملیار دینارەی کە دەگوترێت نانێردرێت، ئەوە بڕیاری لێدراوە و لە چەند رۆژی داهاتوودا دەنێردرێت.
رووداو: بڕیاری ئەنجوومەنی وەزیران هەیە بۆ ناردنی ئەم پارەیە، بەربەستەکانی چین؟
د. لەتیف رەشید: هەموو شتێک لە عێراقدا هەندێک رۆتیناتی تێدایە، رەزامەندی لەم دامەزراوەیەوە بۆ ئەم دامەزراوەی دیکە، ئەنجوومەنی نوێنەران راستە رەزامەندی لەسەرداوە و ناردووشیەتی، بەڵام لە وەزارەتی دارایی و وەزارەتەکانی دیکە دەبێت بڕیاری لەسەر بدرێت. کۆمەڵێک لیژنەی ئابووری و دارایی هەیە گەنگەشەی بابەتەکە دەکەن و بڕیاری لەسەر دەدەن. بەڵام ئەوەی کە من ئاگادارکراوم، بڕیاری لەسەر دراوە و لەم چەند رۆژەش دەنێردرێت.
رووداو: هەموو چاوەکان لەسەر ئەوەن رێککەوتن لەنێوان هەولێر و بەغدا دروستبێت لەسەر بودجەی 2023، بەڵام ئەگەر رێککەوتن نەکرا و بەشە بودجەی هەرێمی کوردستان لە بودجەی 2023 نەبوو، کاتێک هات بۆ لای ئێوە واژووی لەسەر دەکەیت؟
د. لەتیف رەشید: خۆی جێبەجێدەبێت، بودجەی عێراق پەیوەندی بە هەرێمەوە هەیە و بۆ عێراقیشە، خۆ لە هەرێمی کوردستان نوێنەرمان لە ئەنجوومەنی وەزیران و پەرلەمان هەیە، هەموو حیزبەکان نوێنەریان لە پەرلەمان هەیە، بەلای کەمەوە 60 ئەندامی پەرلەمانمان هەیە، دەبێ هەموو ئەوانە رەزامەندی لەسەر بنوێنن و ئینجا بودجەکە پەسند دەکرێت. هیچ کات 100٪ بودجە بە ئارەزووی دامەزراوەیەکی دەوڵەتی عێراق نییە، بەڵام کە پەسند کرا و رێککەوتنی لەسەر کرا ئەوکات دەکەوینە شیکردنەوەی مادەکانی کە چۆن جێبەجێ دەکرێت. دەبێ واز بهێنین تاوەکو بودجەکە پەسند دەکرێت. تائێستا سێ ساڵە بودجەی عێراق پەسند نەکراوە لە پەرلەمان و ئەنجوومەنی وەزیرانەوە، هیوادارین ئەمجارە بەزوویی پەسند بکرێت. چونکە نەک هەر ئێمە، حکومەتی فیدراڵیش زۆری پەلەیە، لەبەر ئەوەی هەموو خزمەتگوزارییەکان وەستاون، جگە لە مووچەی فەرمانبەر کە ئەویش هەمیشە بە رێکوپێکی نادرێت، شتەکانی دیکە هەمووی وەستاون و هەمووی پەیوەندییان بە بودجەوە هەیە. من گەشبینم چونکە ئێستا عێراق داهاتی نەوتی باشە و هەمووشیان بڕیاری ئەوەیان داوە کە دەبێ بودجەکە بەزوویی جێبەجێ بکرێت، چونکە گەلی عێراق و گەلی کورد پێویستی بەوەیە بودجەکە لەبەردەستیدابێت و دەست بکەن بە کاروبار.
رووداو: بەپێی دەستووری عێراق ئەرکی سوپا پاراستنی سنوورەکانی وڵاتە، کەی سوپا و حەشدی شەعبی لە ناوەندی شارەکان دەکشێنەوە و ئاسایشی شارەکان دەدرێتە دەست پۆلیسی خۆجێیی شارەکانەوە؟
د. لەتیف رەشید: پێمخۆشبوو ئەم پرسیارەت کرد. لەم ماوەیەدا هەم بەهۆی یادی سوپای عێراق و هەم بەهۆی ساڵانەی وەزارەتی ناوخۆ کە پۆلیس و هێزەکانی دیکە دەگرێتەوە، هەروەها لەگەڵ سەرۆکوەزیران قسەم کردووە کە پێویستە سوپا لە شارەکان بکشێتەوە و ئەم کاروبارە بدرێتە دەست پۆلیس. لە بەغدا دەستیانپێکردووە و خەریکن زۆربەی شەقامەکان دەکەنەوە و بڕیاردراوە لەبری سوپای عێراق لەماوەی چەند مانگێکی کورتدا شوێنەکان بدرێنە دەست پۆلیس. بۆ شارەکانی دیکەش یەک بە یەک گەنگەشە دەکرێن و حکومەتی عێراقیش زۆ پێداگرە. پرسی گۆڕینی سوپا بۆ پۆلیس، نەک هەر داوایەکی من و تۆیە، ئەمە داوای کۆمپانیا نێودەوڵەتییەکانیشە کە نایانەوێت سیمای سوپا لە شارەکاندا بمێنێتەوە، وەکو پێیدەڵێن شاری سەربازی و کۆمەڵگەی سەربازی.
رووداو: واتا ئەمە کاریگەری هەبووە لەسەر هاتنی کۆمپانیاکان؟
د. لەتیف رەشید: بەڵێ، زۆری کاریگەری هەبووە.
رووداو: بەپێی دەستوور، زمانی کوردی هاوشانی عەرەبی زمانێکی فەرمییە لە عێراق، بەڵام کەموکوڕی هەیە لە جێبەجێکردنی ئەم مادە دەستوورییە، ئێوە چی دەکەن بۆ راستکردنەوەی ئەم کەموکوڕییە؟
د. لەتیف رەشید: نەک ئێستا، چەند ساڵ لەمەوبەریش زۆر سەرقاڵی ئەم بابەتە بووم، من پێموایە لۆمەی هەردوولایە، هەم لۆمەی حکومەتی هەرێمە کە زۆر گرنگی بەمە نەداوە، لە دانانی کتێب و مامۆستا بۆ ئەو قوتابخانانەی کردومانەتەوە لە عێراق، چونکە ئەگەر قوتابخانەکان دەست بە جێبەجێکردنی کاروبارەکان نەکەن، خەڵک فێری کوردی نابێت، بەڵام زمانی کوردی لە دامەزراوەکانی دەوڵەت و پەرلەمان و ئەنجوومەنی وەزیران وەکو زمانی فەرمی دانی پێدانراوە، تەنانەت وەفدەکانمان کە هەندێکجار لە کوردستانەوە دێن بۆ بەغدا، هەندێکجار وەرگێڕ لەگەڵ خۆیان دەهێنن بۆ ئەوەی لە عەرەبییەوە بۆ کوردی وەرگێڕان بکەن. من هیوام وایە هەموو کەسێک لە عێراق کوردی و عەرەبی بە باشی بزانێت، هەم ئێمە لای خۆمان گرنگی بە عەرەبی بدەین و هەم لە باشوور و بەشەکانی دیکەی عێراقیش گرنگی بە کوردی بدەن، ئەمەش دەکەوێتە سەر ئەوەی ئێمە چەند تواناکانمان بەکاردەهێنین و چەند مامۆستا دەنێرین. کاتی خۆی دەستمان کردبوو بە دروستکردنی قوتابخانە، کە بڕیارەکە درا 100 بۆ 150 قوتابخانەمان کردەوە، بەڵام بەداخەوە هیچیان مامۆستایەکیان نەبوو کە کوردییان پیبڵێت.
رووداو: بەهۆی دابەزینی نرخی دینار بەرامبەر دۆلار دۆخی خەڵک خراپ بووە، خەریکە لە عێراق شتومەکیش بەرە بەرە گران دەبێت، چی دەکەن بۆ چارەسەرکردنی ئەم دۆخە؟
د. لەتیف رەشید: من پێموایە ئەو دۆخەی دروستبووە کاتییە و حکومەت زۆر پابەندە بەم بابەتەوە. دابەزینی بەهای دراو لە هەموو وڵاتێکدا روودەدات، ئەگەر بەراوردی بکەی، پاوەنی بەریتانی بەرامبەر دۆلار لە ماوەی ساڵێکدا بە رێژەیەکی بەرچاو دابەزی، یۆرۆ زۆر دابەزیوە، ئەمە پەیوەندی هەیە بە ئابووری جیهانییەوە. شەڕی ئۆکراینا و رووسیا کاریگەری زۆری لەسەر ئابووریی جیهانی داناوە، کاریگەری لەسەر نرخی نەوت و گازیش داناوە. هاوکات کاریگەری لەسەر ئابووری وڵاتان داناوە. بۆ نمونە ئابووریی وڵاتانی ئەوروپا زۆریان لە داکشاندان. هیوادارم ئەوە کاتیی بێت و حکومەتی فیدڕاڵی عێراق بە سەرۆکوەزیران و ئەنجوومەنی وەزیران و بانکی ناوەندیش ئەوەیان لەبەرچاوە و خەریکن. ئەوان نایانەوێت گەلی عێراق بە دابەزینی بەهای دینار زیانیان پێ بگات.
رووداو: ئەو کێشەیە چارەسەردەبێت؟
د. لەتیف رەشید: هیوادارم بە زوویی چارەسەر بکرێت. کۆمەڵێک بابەت هەیە کە پێوەی خەریکن، لەوەی چەند چاودێری هەیە لەسەر حەواڵە لە عێراقدا. تائێستا بەداخەوە هەندێکجار چاودێرییەکی بەهێز نەبووە لەسەر حەواڵەکردنی پارە لە عێراق. ئەو بازرگانانەی پارەیان بردووە و پارەیان هێناوە، زۆرجار زێدەرۆییان لەسەر ئەو شتانە کردووە کە هێناویانە.
رووداو: ماوەیەک لەمەوبەر لەگەڵ سەرۆککۆماری تورکیا بە تەلەفۆن قسەتانکرد، لە ماوەی رابردوو لە ئاسمان و زەوییەوە تورکیا سەروەری خاکی عێراقی پێشێل کردووە، لەسەر ئەم بابەتە گفتوگۆتان کرد؟
د. لەتیف رەشید: لەسەر ئەو بابەتە قسەمان کرد. ئێمە تورکیا بە دراوسێیەکی گرنگ دادەنێین و بازرگانییەکی زۆر بەهێزمان لەگەڵیدا هەیە، لەمەش گرنگتر، سەرچاوەی سەرەکی ئاوی عێراق لە تورکیاوە دێت، بەڵام ئەو هەڵوێستەی تورکیا هەیەتی بەرامبەر هاتنەناو عێراقەوە، چ بەهۆی سوپاوە و چ بەهۆی فڕۆکەکانیانەوە، حکومەتی عێراق و حکومەتی هەرێم و خەڵکی عێراق و گەلی کوردیشی ئیحراج کردووە و لە هەموو روویەکەوە پێی ناڕازین. وەزارەتی دەرەوەی عێراق چەند جارێک ئاگاداری کردوون. دوایین جاریش کە دیپلۆماتەکانیانم بینیوە، وەڵامم بۆ ناردوون کە ئێمە ناتوانین هەموو پەیوەندییەکانمان سروشتی بێت، بەڵام لە هەمانکاتدا پێشێلی سنوورمان بکرێت. هەندێکجار بەزاندنی سنوورەکەمان دەگاتە ناوچەی سلێمانی، گەلی کورد بەمە ناڕازییە گەلی عێراق و حکومەتی عێراق و حکومەتی هەرێمیش پێی ناڕازین.
رووداو: ئەمە بۆ ئێرانیش هەر بەم شێوەیە؟
د. لەتیف رەشید: بۆ هەموو وڵاتێک ئەمە راستە و نابێ پێشێلی سنوورمان بکرێت. خۆ ئێمە هەندێکجار گلەیی لە سووریاش دەکەین کە تیرۆریستەکان دێنە ناوەوە، لە وڵاتەکانی تریش کە تیرۆریستان لێیانەوە دێن. رەنگە خۆتان بزانن کە لە باشووری عێراقیش تیرۆریستان هاتنە ناو عێراقەوە و ئەوانیشمان ئاگادارکردەوە. بەڵام هەبوونی تورکیا بەشێوەیەکی بەرچاو و زیاترە و قبوڵکراو نییە. هیوامان وایە ئەوان گوێ لەم ئامۆژگارییە ئێمە بگرن، هاوکات هەندێک کێشەی دیکەمان لەگەڵ تورکیا هەیە کە هیوادارین ئەوانیش چارەسەر بکرێت، کە یەک لەوان پرسی ئاوە. ئێمە ئێستا لە عێراق ئاومان لە جاران زیاتر پێویستە و لە تورکیاش ئاویان لە جاران زیاتر پێویستە، بەڵام دەبێ بگەینە ئەوەی کە پشکێکی دادپەروەرانە بەردرێتەوە ناو عێراق کە دەبێت بە رێککەوتنی نێوان ئێمە و تورکیا بێت بۆ ئەوەی لەو پشکە بێبەش نەبین. لە هەندێک کاتدا پشکی ئاومان ئەوەندە کەم بووەتەوە کە نەمانتوانیوە کشتوکاڵەکەمان بەباشی بەڕێوەببەین. بۆ ئاوی خواردنەوە ئەگەر خۆمان ئیدارەکەمان بە رێکوپێکی بدەین و پرۆژەی ئاو بکەینەوە، کێشەمان نابێت. هاوکات لەسەر ئێمەش پێویستە هەندێک پلان دابێین بۆ چارەسەرکردنی کەمئاوی لە عێراق و دەبێت ئیدارەدانی ئاوەکەمان بەهێز بکەین و نەهێڵین بەفیڕۆ بڕوات. هەموو کەسێک ئێستا لە عێراق ئاو لە جاران زیاتر بەکاردەهێنێت و کشتوکاڵمان زیاترە، جگە لەمەش ئێستا ژمارەی دانیشتووانی عێراق گەیشتووەتە 40 ملیۆن کەس. بۆ ئەمانە کۆمەڵێک پلانمان داناوە کە کاتی پێویستە بۆ جێبەجێکردنیان و هیوامان وایە وڵاتانی دراوسێش یارمەتیمان بدەن.
رووداو: کێشەکانی نێوان پارتی و یەکێتی، بەتایبەتی لەنێو حکومەتی هەرێمی کوردستاندا گەورە بووە، بەیاننامە لەدژی یەکدی دەردەکەن، وەکو سەرۆککۆمار بەنیاز نین هەنگاو بنێن بۆ چارەسەرکردنی کێشەکان و کۆبوونەوەی نێوانیان؟
د. لەتیف رەشید: بۆ بەهێزکردنی پەیوەندی لەنێوان هەموو هێزە سیاسییەکاندا هەموو کاتێک هەنگاومان ناوە، لەو رۆژەوە کە هاتووم بۆ بەغدا و پێشتریش هەنگاوم ناوە. من بەمانە ناڵێم کێشەی گەورە، بەڵێ هەندێ جار سۆشیالمیدیا یارمەتی نادات و شتەکان زیاتر فراوانتر دەکەن و گرنگی زیاتری پێدەدەن و تارادەیەکیش زیاتر تۆخی دەکەنەوە. پێموایە ئەمە تێنەگەیشتنە لە هەندێک لە کاروباری حکومی و کاری حیزبایەتی.
رووداو: چارەسەردەبن؟
د. لەتیف رەشید: هیوام وایە چارەسەر بکرێت و من پەیوەندی بەردەوامم هەیە لەگەڵ هەردوولا و خەڵکی دیکەش هەیانە، هیوادارین بەمزووانە بگەنە ئەنجامێکی باش.
رووداو: دوێنێ ئێوارە لەگەڵ سەرۆکوەزیران باستانکرد؟
د. لەتیف رەشید: بەڵێ. نەک ئێستا هەفتەی رابردووش کە لە بەغدا بوو لەگەڵی باسمکردووە، هەموو کاتێک باسی دەکەم و نەک هەر لەگەڵ ئەو، بەڵکو لەگەڵ کۆمەڵێک خەڵکی دیکەش باسم کردووە. تاوەکو ئێمە لە هەرێمی کوردستان بەهێزبین و تاوەکو پەیوەندی حیزبە سیاسییەکانمان رێک و بەهێزبێت و یەکدەنگبین، لە هەموو روویەکەوە زیاتر بەهێزدەبین. لە بودجە و جێبەجێکردنی بڕیارەکانی دیکەش. هیوادارم ئەم پەیامە بگاتە هەموو هێزە سیاسییەکانی کوردستان کە پێویستمان بە یەکێتییەکی بەهێز هەیە بۆ ئەوەی یەک دەنگ بەکاربهێنین لە بەغدا و یەک ئامانج و پرۆگراممان هەبێت بۆ خزمەتی گەلی کورد.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ