کوردستان
هاونیشتمانییەک لەکاتی دەنگدان لە هەڵبژاردنی تایبەت بۆ خولی شەشەمی پەرلەمانی کوردستان، وێنە: بڵند تاهیر - رووداو
رووداو دیجیتاڵ
ئەساقیفەی کەنیسە لە عەنکاوە پەیامێک ئاراستەی کریستیانەکان دەکات و داوایان لێدەکات بەشدارییەکی کارایان لە هەڵبژاردنی پەرلەمانی کوردستان هەبێت؛ ئاماژە بەوەش دەکات، هەرێمی کوردستانی ئازیز ئەمڕۆ گەورەترین کۆمەڵەی تەبا و جێگیری کریستیانەکانی لە رۆژهەڵاتی نێوەڕاستی لەخۆگرتووە و پاراستنی ئەوەش بە بەرپرسیاریێتیی هەمووان دەزانێت.
سبەی (یەکشەممە، 20-10-2024) دەنگدانی گشتی بۆ هەڵبژاردنی خولی شەشەمی پەرلەمانی کوردستان بەڕێوەبچێت.
بەم بۆنەیەوە، ئەساقیفەی کەنیسە لە عەنکاوە لە پەیامێکدا داوا دەکات کریستیانەکان بەشدارییەکی "کارا و راستەقینە" بکەن و دەڵێت، "وەک بڕوادار، بەشداریکردن لەم پرۆسە دیموکراسییەدا بە ئەرکی خۆمان دەزانین".
ئەساقیفەی کەنیسە لە عەنکاوە هەڵبژاردن بە دەرفەتێک دەزانێت "بۆ ئەوەی هاووڵاتیان گوزارشت لە بۆچوونیان بکەن و ئەو نوێنەرانە هەڵبژێرن کە خواستیانە، بۆ ئەوەی ئەو نوێنەرانە لەگەڵ خوشک و براکانیان لە پەرلەمانی کوردستان بەشداربن لە بەردەوامیدان بە بنیادنان و بەشداریکردنی هەمووان لە رەخساندنی ئاییندەیەکی باشتر بۆ نەوەکانی داهاتوومان".
لە هەڵبژاردنی پەرلەمانی کوردستاندا 3 کورسی کۆتا بۆ کریستیانەکان تەرخانکراوە. هەریەکە لە هەولێر، سلێمانی و دهۆک کورسییەکیان بۆ دیاریکراوە.
ئەساقیفەی کەنیسە لە عەنکاوە دەڵێت، "هەرێمی کوردستانی ئازیز ئەمڕۆ گەورەترین کۆمەڵەی تەبا و جێگیری کریستیانەکان لە رۆژهەڵاتی نێوەڕاست لەخۆگرتووە. پاراستنی ئەو تایبەتمەندییەش بەرپرسیاریێتیی هەموومانە و ئەوەش هانمان دەدات کەسانی گونجاو بۆ ئەم ئەرکە هەڵبژێرین."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ