بەشێکی لایەنگرانی لیستە عەرەبییەکان بەمشێوەیە ئاهەنگیان گێڕا لە کەرکووک
رووداو دیجیتاڵ
شەش کەس بەتۆمەتی بەرزکردنەوە و گوتنەوەی هوتاف بۆ سەدام حوسێن لەکاتی ئاهەنگگێڕانی "خۆشی دەربڕین بەبۆنەی سەرکەوتن لە هەڵبژاردن" لە کەرکووک دەستگیرکران.
هەردوو دەزگای هەواڵگری و ئاسایشی نیشتیمانی دەستگیرکردنی شەش کەسیان راگەیاند، کە لە گرتە ڤیدیۆییەکاندا دەرکەوتن و لەبەردەم باڵەخانەی پارێزگای کەرکووک درووشمیان بۆ سەدام دەگووتەوە و، وێنەی سەدامیان بەرزدەکردبووەوە.
هێشتا ئەنجامی کۆتایی هەڵبژاردنی ئەنجوومەنی پاریزگاکانی عێراق لەلایەن کۆمیسیۆنەوە رانەگەیێندراوە، بەڵام بەپێی ئەنجامی بەرایی هەڵبژاردنەکان، تاڕادیەک سەنگ و قورسایی لایەنە سیاسییەکان دەرکەوتووە و کۆمیسیۆن ئەنجامی رێژەی 94.4٪ـی دەنگەکانی ئاشکرا کردووە.
بەگوێرەی ئەو ئەنجامانە، کورد لە کەرکووک حەوت کورسی، لایەنە عەرەبییەکان پێنج کورسی، تورکمان دوو کورسی و بزووتنەوەی بابلیوونیش یەک کورسی بەدەستهێناوە. بەو بۆنەوەیە شەوی رابردوو (چوارشەممە، 20-12-2023) ژمارەیەک هاووڵاتیی عەرەب لەبەردەم باڵەخانەی پارێزگای کەرکووک ئاهەنگیان گێڕا.
هیوا حوسامەدین، پەیامنێری رووداو لە کەرکووکەوە گوتی: وەک لە ڤیدیۆیەکدا دەردەکەوێت، لایەنگرانی لیستە عەرەبییەکان بە ئاشکرا درووشمی 'بروح و بدم، نفدیک یا صدام - واتا بە رۆح و خوێن قوربانی تۆین ئەی سەدام' دەڵێنەوە و ترسیان لە ئاشکرابوونی ناسنامەیان نییە. ئەوەش لەکاتێکدایە بەپێی دەستووری عێراق؛ ستایشی رژێمی رووخێنراوی پێشوو و بانگەشە بۆ حیزبی بەعس، قەدەخەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ