وەزیری ناوخۆ: نابێت بەهیچ شێوەیەک چاوپۆشى لە زێدەڕۆیی بکرێت

 

رێبەر ئەحمەد، وەزیرى ناوخۆی هەرێمی کوردستان جەختی لە هەوڵەکانی حکومەت بۆ چارەسەرکردنی کێشەی مووچە و شایسە داراییەکان کردەوە و رایگەیاند، "حکومەتی هەرێمی کوردستان بەردەوامە لە کاری هاوبەش بۆ کۆتاییهێنان بەم کێشەیە، کە بەداخەوە، کاریگەریی زۆری کردووەتە سەر بژێوی و بارودۆخی ژیانی مووچەخۆران و هاووڵاتییانی هەرێمی کوردستان بە گشتی".

 

ئەو قسانەی وەزیری ناوخۆ لە کۆبوونەوەیەکدا بوو کە وەزیری شارەوانی، بەڕێوەبەری گشتیی دیوانی وەزارەتی ناوخۆ، پارێزگاری هەولێر، قایمقام و بەڕێوەبەری ناحیەکان، سەرۆکی شارەوانییەکان، بەڕێوەبەری کشتوکاڵ، بەڕێوەبەرانی نەخشەدانانی ئاوەدانی و لایەنە پەیوەندیدارەکانی دیکە ئامادەی بوون.

 

رێبەر ئەحمەد باسی "پیلانێکی کرد کە لە دژى قەوارەى هەرێمى کوردستان گیرابوونەبەر، بۆ ئەوەی قەوارەی هەرێمی كوردستان نەمێنێت، یاخود لاواز بكرێت، بەڵام نەتوانرا ئیرادەى خەڵکى هەرێمى کوردستان لاواز بکرێت، هەرێمى کوردستان لە پێشکەوتنەکانى نەوەستاوە و بەردەوام بووە لە گەیاندنى پڕۆژە و خزمەتکردنى هاوڵاتییانى". 

 

لەبارەی رێگریکردن لە زێدەڕۆ بۆ سەر موڵکی گشتی، رێبەر ئەحمەد گوتی، "دەبێت بەرپرسانى یەکە کارگێڕى و ئیدارییەکان و فەرمانگە خزمەتگوزارییەکان و سەرجەم دامودەزگاکانى ترى حکومەت بە تووندى بەردەوامبن لە رێگریکردن لە زێدەڕۆیى و هەرسەرپێچییەک هەبێت راستەوخۆ بڕیارى چارەسەرکردنى لێبدرێت، ئەو کەس و لایەنەشى رێگەیان بە ئەنجامدانى زێدەڕۆییەکە داوە رێکارى یاساییان لە بەرامبەردا بگیرێتەبەر و لێپرسینەوەش لەگەڵ هەموو ئەو کەس و لایەنانەش بکرێت کە لەسەرحسێبى خەڵکى هەژار و کەمدەرامەت بازرگانى بە موڵکى حکومەت و گشتیى دەکەن". باسی لەوەش کرد، "رێگەپێدان بە زێدەڕۆیی پێچەوانەى یاسا و بڕیارەکانى حکومەتە و نابێت بەهیچ شێوەیەک چاووپۆشى لێبکرێت".

 

وەزیری ناوخۆی هەرێمی کوردستان باسی لە پاراستنی حەرەمى گوند و چارەسەرکردنى گرفت و کێشەکانى کرد و گوتی، "دەبێت لە زوترین کاتدا میکانیزمى گونجاو بۆ چارەسەرکردنى ئەو پرسە و پۆلێنکردن و نیشانکردنى لە سنوورى پارێزگاى هەولێر بە هەماهەنگى و هاوکارى لایەنە پەیوەندیدارەکان بکرێت و رێوشوێنى پێویست بگیرێتەبەر".

 

ئومێد خۆشناو، پارێزگاری هەولێر لە کۆبوونەوەکەدا جەختی لەسەر کەمکردنەوەی رۆتین و رێزگرتن لە هاووڵاتییان لە فەرمانگەکان کردەوە و رایگەیاند، دەبێت کارئاسانیی تەواو بۆ هاووڵاتییان بکرێت.

 

کۆبوونەوەکە بڕیاری دا لیژنەیەکی تایبەت لە وەزارەتەکانى ناوخۆ، وەزارەتى شارەوانى و پارێزگاى هەولێر پێکبهێنرێت و لە ماوەی یەک هەفتەدا پرسی زێدەڕۆ بۆ سەر موڵکی گشتی یەکلایی بکەنەوە.